Halor ka Ïew Mawsynram : Kynnoh ki MDC Liang Pyrshah ba ïalam bakla u EM Council Asset ïa ka Ïingdorbar

Shillong, Risaw 24: Ki MDC ka Liang Pyrshah ha Khasi Hills Autonomous District Council (KHADC) ki la pynrem jur ïa u Executive member (EM) ba khmih ïa ka Council assets u Bah Pynkhrawboklin Kharjahrin, ha kaba ki la kynnoh ba u la pyrshang ban ïalam bakla ïa ka ïing da kaba ong ba kam shym la don ka jingïamynjur kaba la dep soi ha kaba ïadei bad ka jingpynïaid bad sumar ïa ka Mawsynram market complex.
Haba jubab ïa ka jingkylli u MDC ka NPP na Mawsynram u Bah Alvin Sawkmie hapoh ka Dorbar ha ka sngi Thohdieng, u Bah Kharjahrin u la ong ba ka jingtei ïa ka Ïew la pyndep bad ïa ka projek yn pyntreikam noh ha ki bnai ban wan.
U Bah Sawkmie u la pynpaw ruh ka jingsngewkhia halor ka jingpynïaid bad sumar ïa ka ïew, bad kylli ba mano ban kitkhlieh ïa ki jinglut.
U Bah Kharjahrin haba jubab u la ong ba kam pat don ka jingïamynjur hapdeng ka council bad ka dorbar shnong haba ïadei bad ka jingsumar ïa ka market complex. U la bynrap ba kane ka EC ba thymmai kan bishar bad shim ïa ki kam kiba kongsan.
“Kam don ka jingïathuh kaba lah ban don hapoh ka file. Kam shym la don ka jingmynjur halor kane ka project. Ka EC kan pynthikna ba kano kano ka jingpynlut halor ka council assets ne nongkynti kin long ka jingmyntoi ïa ka council bad ki nongshong shnong,” bynrap u Bah Kharjahrin.
U Bah Sawkmie u la kynnoh ïa u Bah Kharjahrin ba u la ïalam bakla ïa ka Ïing, da kaba kdew ba ka market committee ka la don bad la dep thaw bad la dep ruh ban soi ïa ka jingmynjur bad ka district council.
“Ngam kwah ba u EM un ïalam bakla ïa ka ïing namar ka market committee ka la dep don, bad la soi ka jingmynjur bad ka district council. Kumno u EM u ong ba kam don ka jingmynjur? Kumno u lah ban ïalam bakla ïa ka ïing?”
Halor kane u Bah Kharjahrin u la kyntait, da kaba ong ba u la kren da kaba phai sha ki jingtip kiba don bad u.
“U dkhot um lah ban ong ba nga ïalam bakla ïa ka ïing namar nga phai bad jubab katkum ki jingtip ba don bad nga. Hadien ba la pyndep kane ka project kan hab hapoh ka tnat market.”
U nongïalam ka liang pyrshah u Bah Titosstarwell Chyne u la buh ka jingkylli ïa u Bah Kharjahrin halor ki jingbym kynmaw jong u ïa ka tarik ne u bnai ba la pynlait ïa ka file kaba ïadei bad ka Mawsynram market complex.
U Bah Kharjahrin u la jubab da kaba ong ba ka long kaba eh ïa u ban kynmaw namar ka jingdon jong kiba bun ki file.
“Ngam lah ban kynmaw ïa ka tarik kaba thikna ha kano ka tarik ba nga la pynlait ïa ka file. Hadien ba la pyndep ka jingtei ïa ka Mawsynram complex, ngin sa ïasyllok ïa ka bhah hapdeng ka council bad ka dorbar shnong. Ka project ka la dep hynrei ngim pat ïoh ka shithi aiti na u contractor. Hadien kane ngin sa ïasyllok bad ka dorbar shnong halor ka jingsumar, ka jingpynïaid ïa kane ka market complex,” u la ong da kaba bynrap, “Ka long kaba eh ïa nga ban kynmaw namar ki don shibun ki file. Nga kyntu ïa ki dkhot ban ym pynlehnohei kai ïa ka por ha kum kine ki kam kiba rit.”
Halor kane u Bah Chyne u la ong, “Kane kaba ym lah ban pdiang namar u EM u dei ban long uba la pynkhreh haba wan sha ka Dorbar. Phim lah ban ong ba phim kynmaw, phi dei ban peit ïa ki record.”
Katba ka MDC ka NPP na Nongshken ka kong Grace Mary Kharpuri ka la banjur halor ka jingdonkam ka jingïamynjur ha shwa ban aiti ïa ka market building.
Haba jubab u EM u la ong, “Ngi la khmih bad bishar ïa baroh ki project jong ka council. Kumno nga lah ban peit ïa ka jingmynjur? Kam dei ka kam jong ngi. Lada ngi la don hangne kumba 5 snem mynshwa, ngi la dei ban pyntreikam ïa ki jingai jingmut jong phi. Ngi dang buddien ïa baroh ki project jong ka council. Ka EC kan pynthikna ba ki project kin long ka jingmyntoi jong ka council bad ki paidbah.”
Haba ka Kong Kharpuri ka kwah tip ba katno tylli ki market complex ba la dep mang da ka council, u Bah Kharjahrin u la ong, “Ban ïathuh ïa ka jingdon ki ïew ka long kaba eh naba katto katne ki market complex kiba la pyndep ki la hab hapoh ka tnat market, bad kito kiba ym pat pyndep ki hab hapoh ka council assets. Mab ïa nga, hynrei kito kiba ym pat pyndep ki don artylli kawei ka dei ka Mawsynram bad kawei ka Riangdo.”
Haba ka Kong Kharpuri ka pynpaw ba ka jubab u EM kam long kaba shai, u Bah Kharjahrin u la ong, “Kumno nga lah ban ai ka jingtip kaba ym don hapoh ka meij jong nga? Nga ai jingmut ïa ka MDC ban thoh sha ka tnat market lada ka kwah ban ïoh ki jingtip ba bniah.”