Shillong, Jymmang, 10: Ka kynhun ki nongmihkhmat jong ki nongsynshar riewlum bad kynthup ruh ïa ki Heh Ophisar jong ka Ministry of Chittagong Hill Tracts, Bangladesh bad ki nongmihkhmat na ka United Nations Development Programme ba la ïalam da u Raja Devasish Roy, uba long u khlieh nongsynshar ba pawkhmat ki Chakma bad uba pule ruh ïa ka Aiñ halor ka bishar ha ka sngi Baar ki la ïakynduh kyrpang ïa u Chairman jong ka Khasi Hills Autonomous District Council (KHADC) u Bah Lamphrang Blah ban ïasam jingtip halor ka rukom bishar ki riewlum.
Ka jingïathir ïatai ha kane ka sngi ka long halor ka rukom bishar ba la pyntreikam ha kane ka jylla Meghalaya, Nagaland, bad wat ha ka jylla Tripra.
Ïa kane ka jingïalang la pynlong ruh da ka Sustainable Inclusive Development ha Chittagong Hill Tracts bad ka UNDP Office ha Dhaka.
Kane ka kynhun ha ka jingkynduh ïa u Chairman jong ka Khasi Hills Autonomous District Council (KHADC) u Bah Lamphrang Blah bad ïa u Nongbishar ka District Council Court u Justice S. Kharsyiemlieh ki la twad jingmut ha kaba ïadei bad ka bishar ka bishnot halor ka hok nongkynti jong ki riewlum halor ka khyndew ka shyiap, ka khlaw ka btap, ki riti ki dustur, ki dorbar shnong bad halor ka jingpyntreikam ïa ka aiñ ha ri India bad ha ka ri Bangladesh kaba lah ban pynmyntoi ïa ki riewlum jong kine ki ar tylli ki ri.
Ha kane ka jingïasam jingtip la ai jingkren da u Justice S. Kharsyiemlieh bad u Syiem Devasish Roy.
U Nongbishar Kharsyiemlieh u la kren halor ka bor ka iktiar jong ka District Council Courts halor ki riewlum ha kaba pyntreikam ïa ka aiñ Civil Procedure Code, ki apil, ki jingkyrpad bad ka jingpynmih hukum bad kiwei kiwei de ki rukom bishar jong ki riewlum kiba long katkum ka riti ka dustur.
U Syiem ka Roy u la batai shaphang ka rukom bishar ha ki jaka riewlum ha ka ri Bangladesh kaba ïadei bad ka National Act bad Rule jong ka ri Bangladesh bad kren ruh halor ki kaiphod bad ki artikil jong ka rukom bishar ha Chittagong Hill Tracts, Bangladesh.
U Chairman ka KHADC ula aiti ruh ïa ka Autonomous District Council Rules sha kane ka kynhun khnang ba kin dup lah ban pule bniah ha kaba ïadei bad ka jingbishar kaba hok.
Ha ka por janmiet, kane ka kynhun ka la ïakynduh ïa u Chairman jong ka Federation of Khasi States u Bah John F. Kharshiing ban ïakren halor ka hok ki riewlum hapoh kane ka thaiñ Shatei Lammihngi bad ïa ki riewlum ha ka ri Bangladesh.
Kane ka kynhun kan sa leit jngoh ruh ïa ka Nagaland bad ïa ki nongïalam ka Tripra Indigenous People Organisations (TIPO).
