Tura, Iaiong 29 : U Chairman ka Lokayukta u bah B.Dhar, IAS, u la hukum ban kem ïa ki lai ngut ki briew halor ka jamin kaba 20,000 marwei ha kaba ïadei bad ka jingkynnoh bamsap ïa ka pisa ba ïadei bad ki kam pynroi pynpar jongka GHADC ha Asanang Constituency.
Ka ïing bishar Lokayukta ka la phah ïa kane ka hukum lyngba u SP ka West Garo Hills naduh ka 20 tarik mynta u bnai hadien bala dep bishar ïa kane ka mukotduma kaba sahteng ba la ujor da u Nilberth Ch Marak pyrshah ïa ki lai ngut ki kontraktor ïa u Ismail Marak, Kuban Sangma bad Nikseng Sangma.
Kane ka long ka mukotduma ba nyngkong ba la ujor da u Nilberth ha Lokayukta lyngba u nongïasaid aiñ jong u u P.T Sangma.
Kham mynshwa ha ka 24 tarik Naitung 2019 ka ïing bishar Lokayukta ka la hukum ban tohkit da ka CBI halor kane ka jingkynnoh bamsap bad ban pyngat kyndon ruh kat kum ki jinglap na ka jingtohkit.
Hynrei halor kane u Kubon bad u Ismail ki la leit ujor sha ka ïing bishar High Court pyrshah ïa ka hukum ka ïingbishar Lokayukta.
Hynrei ka ïing bishar haba shim bishar ha ka 6 tarik Iaiong 2021 ka la pynwai noh ïa kane ka mukotduma namar ki la don ki jingpynkylla ïa ki kyndon aiñ Lokayukta Act 2014 da kaba wanrah ïa ka Meghalaya Lokayukta (Amendment) Act 2021 bad kumta la pynphai biang ïa kane ka mukotduma sha ka ïing bishar Lokayukta.
Na ka liang u Chairman ba thymmai u bah B.Dhar u la buh tarik ban bishar ha ka 25 tarik u Lber 2022 bad hadien kane ha ka 20 tarik Iaiong 2022 ban bishar ïa kane ka mukotduma hynrei ha baroh arsien kitei ki briew ki khlem wan mih hakhmat ka ïing bishar.
Dei halor kane ka nongrim ba ka ïing bishar Lokayukta ka la pynmih ïa kane ka hukum ban khlem halor ka jamin ba 20 hajar tyngka ïa kitei ki lai ngut. Kane ka mukotduma ka long halor ka jingbym pyntreikam ïa ki 49 tylli ki project jongka GHADC ha Asanang Constituency, West Garo Hills na ka bynta u snem 2017-18. ïa baroh kine ki projek la ai sha kitei ki arngut ki kontraktor u Kubon bad u Nikseng.
Ha ka jingtohkit ba malu mala da u SDPO ka Raksamgre Sub Division kat kum ka kaiphod ba la phah sha u SP ha ka 3 tarik Jylliew 2019, la lap ba na kitei ki 49 tylli ki project la shna tang kawei ka sem ha Lum Jingtep ha Balupara bad kawei ka tyllong umdih ha Daljagre. Katba ka pisa pat ba la mang na ka bynta kitei ki 49 projek ki long 1 klur tyngka bad la dep sei ruh ïa baroh ka pisa na GHADC.
