Hakhmat u myntri sorkar pynpaw ki nongialam shnong halor ka jingshah ktah na ka lyer karkhana Coke

Khliehriat jylliew 06: Ka shnong Narwan kiba don ha East Jaintia Hills District ka dei ka shnong kaba la paw bha ha ka jingrep ïa u soh ñiamtra, ki paidbah nongshong shnong ki dei kiba ju im ja da ka rep soh, hynrei mynta ka jingrep soh ka la shah ktah jur ha ka lyer jakhlia kaba wan na ki karkhana coke kiba don ha Sookilo kiba don hajan ka shnong Narwan.
Halor kane ka jingshah ktah ki ar ngut ki Waheh Shnong jong ka thaiñ ki la pynsngew sha u Myntri ka sorkar jylla, u James P.K.Sangma ha ka jingialang ba la pynlong myn sngi saitjaiñ bad kumjuh ruh la pynpaw lyngba ka Memorandum.
Katkum ka memorandum ba la soi kyrteng da u Waheh Shnong Narwan, u bah Lamsuk Langstang bad u Waheh Shnong jong ka Sahkai, u bah Lim Shadap, ki la pynpaw bad pynsngew ïa ka jingshah ktah ka rep soh ñiamtra kaba na ka daw ka jingdon ki karkhana coke kiba don ha Sookilo kiba don hajan ka shnong Narwan bad ka shnong Sahkai, ha kaba naduh u snem 2020 ki la sdang ban paw ki dak ki shin jong ka jingshah ktah ki soh bad ki jingthung jingtep, ha kaba ki nongshong shnong kiba ju rep soh niamtra ki la iohi ïa ka jingpher ha ka rukom ih ki soh, kumjuh ruh kawei kaba ki ju sngew phylla ka dei ka jinghap jingtlor ki syntiew jong ki dieng soh kiba la sdang ban phuh syntiew ban pynmih soh bad ki nongshong shnong ki suba jur ba dei namar ka jingwan beh ka lyer jakhlia kaba na ki karkhana coke kiba don hajan kaba la pynlong ïa ki syntiew jong ki deing soh ban hap bad tlor, kane mynta ka la buh jingma ïa ki nongshong shnong kiba ju im ja da kaba rep soh ñiamtra.
Kawei ruh ka bynta kaba sngew khia eh kaba la pynpaw da kitei ki Waheh Shnong ka dei ka jingshah ktah ki briew ha ka lyer ba ring mynsiem, ha kaba ki paidbah khamtam ki tymmen, ki khynnah, ki khyllung ki ring mynsiem ïa ka lyer jakhlia kaba sam iwtung kaba mih na ki karkhana coke kiba don hajan shnong bad kane ruh ka dei kawei na ki jingheh kaba khraw ba ki nongshong shnong ki iakynduh kaba lah ban ktah ïa ka koit ka khiah.
Kawei ruh kaba pyn lyngngoh ïa ki nong shong shnong ka dei ka jingshah ktah kiwei kiwei ki jait jingthung ruh ka long ba naduh ba pyntreikkam ki coke, kam sym la don shuh ka jingmih ki sla thymmai ha ki jingthung bad ong ba ka daw bah jong kane ka dei namar ka jingwan beh ka lyer bih kaba na ki karkhana coke kiba don ha Sookilo, kane ka jingbym mih sla thymmai ki jingthung jingtep mynta ka la wanrah sa ka jingduna jingbam ha ki mard kum ki masi ki blang kiba ju bam phlang bam sla sha lum sha wah.
Lyngba ka jingthoh u bah Lamsuk Langstang bad u bah Lim Shadap ki kyrpad ïa u myntri sorkar, u James Sangma ba un shim khia lem ban leh ei ei halor kane ban weng ïa kitei ki jingeh ba ki paidbah nongshong shnong ki iakynduh.
Haba kren ha ka jingialang ba la pynlong ha shnong Narwan, u bah Lamsuk Langstang, u la pynpaw shuh shuh ruh da kaba ong ba ki nongrep soh ñiamtra ha shnong ki hap ban sait shwa ïa ki soh ha shwa ba kin leit die sha ïew namar ki soh ki la sop rong ïong lut namar ka jingwan beh ka lyer jakhlia na ki karkhana, u la pynpaw ruh ïa kitei ki juh ki jingeh kumba la pynpaw ha ka memorandum bad u kyntu ïa u myntri sorkar ban leh eiei bad ban bthah ïa ki trai jong ki karkhana coke ba kin da pyndonkam da ki kor ki bor kiba biang (Air Filter) ban lait na ka jingpynmih ïa ka lyer jakhlia khnang ba ki paidbah nongshong shnong, ki jingthung jingtep bad ka mariang kin nym shah ktah than ha ka lyer bih, ka lyer jakhlia kaba mih na ki karkhana coke.