Hakhmat ki nongïalam ka FASToM kular u Dy.CM ban pynkiew ïa ka tulop

Shillong, Naitung, 01: U Symbud Myntri Rangbah ka Jylla u Bah Prestone Tynsong ha ka jingïakynduh ïa ki nongïalam ka Federation of All School Teachers of Meghalaya (FASToM) ha ka sngi Thohdieng u la kular ba ka Sorkar Jylla kan sa pyntreikam ïa ka jingdawa ban pynkiew tulop ïa ki nonghikai skul Adhoc ha ka jylla baroh kawei.
Kane ka jingïakhih jong ki nonghikai skul Adhoc da kaba sahmiet syndon ha surok ka la kynjoh sha ka sngi kaba saw ha nongbah Shillong bad ha Tura.
U Nongaiktien jong ka FASToM u Samla Mayborn Lyngdoh ha ka jingïakren bad ki lad pathai khubor hadien ka jingïakynduh ïa u Symbud Myntri Rangbah, u la ong, “u Symbud Myntri Rangbah u la ai ka jingkular kaba thikna ba ïa ka mat jingdawa jong ngi ki nonghikai yn buh hakhmat eh kum ka mat ïatai kaba nyngkong ha ka jingïalang jong ka Kynhun Mynti ka ban sa long.
U la ïathuh ba u Bah Prestone u la ai ka jingkular kaba 101% ba ha kane ka mat yn ïatai ha ka jingïalang jong ka Kynhun Myntri ban ïathir sani shwa ban ai ïa ka jingmynjur.
U la ong ba katkum ka jingïathuh jong u Symbud Myntri Rangbah, ïa kane ka jingdawa jong ki nonghikai la ïatai ha ki ar sien kynthih ki jingïalang jong ka Kynhun Myntri hynrei ka jingbym lah ban pynurlong ka dei na ka daw ba u Myntri ka Tnad Pule Puthi u Bah Lahkmen Rymbui u la pep ha ka sien shong jingïalang kaba lai jong ka Kynhun Myntri.
Ha kaba ïadei bad ka jingkyrpad jong u Symbud Myntri Rangbah ban weng noh ïa ka jingïakhih, u Nongaiktien ka FASToM, u la ong, “ngi la ïathuh da kaba shai (ha u Symbud Myntri Rangbah) hashuwa ba ngin shim ïa kata ka rai ngin hap ban ïoh lang ïa ka jingmynjur na baroh ki para nonghikai.”
Halor kane ka jingïashim bynta jong ki nonghikai skul Adhoc ha kane ka jingïakhih, u Samla Mayborn u la ong, ‘kat haduh mynta hi na ka liang ki School Managing Committee kim don eiei ka jingujor halor kane ka jingïakhih namarba kam don jingktah satia bad ba ka dei ruh ka por ba bun hi ki skul ki la ïoh shuti lyiur.”
Ha kaba ïadei bad ka jingong jong u Symbud Myntri Rangbah ba ym tang ka Sorkar kaba dei ban siew tulop hynrei wat ki School Managing Committee (SMC) ki dei ban ïa don bynta lang ban shim ïa kane ka jingkitkhlieh, une u Nongaitkien jong ka FASToM u la ong ba um lah ban ong eiei halor kane namarba kum ki nongshah ai kam kim donhok ban jubab ïa kaei kaba u nongai kam u dei ban ong.
Shuh shuh u la ong, ïa ka tulop jong ki nonghikai Adhoc dei beit ka Sorkar kaba siew bad buh dor ïa ka tulop watla ka ju ai sha ki School Managing Committee ïa ka pisa lyngba ka Lump-sum Grant hynrei ynda ki la ïoh ïa ka tulop na ki School Managing Committee katkum ka dor ba la buh ka Sorkar ki nonghikai ki ju soi ïa ka syrnot pynshisha ba la pyntreikam ïa ka pisa ba la mang da ka Sorkar.
Ha kane kajuh ka sngi, ki nongïalam jong ka All India Congress Committe (AITC) Meghalaya hapoh ka jingïalam jong u Vice President u Bah George B. Lyngdoh ki la leit ban ai mynsiem ïa ki nonghikai skul Adhoc kiba pynlong ka jingïakhih kaba jaijai.
Ki Nonghikai Adhoc ki la dawa ïa ka Sorkar Jylla ba kan pynkiew noh ïa ka da T.18000 hajar bad ka jingpynkiew tulop kaba 5% manla u snem.