Hakhmat ki lad pathai khubor kob ïatai nia u heh TMC ïa u Conrad Sangma

Shillong, Nailur, 27: U National Spokesperson jong ka All India Trinamool Congress (AITC) u Saket Gokhale ha ka sngi Baar u la kob ïatai nia ïa u Myntri Rangbah ka Jylla u Conrad K. Sangma hakhmat ki lad pathai khubor ha kaba ïadei bad ki Smart Electricity Meters, ka jingkhyllem u tnum pyllun ka Ingdorbar Thawaiñ ba thymmai ka jylla, ka jingdkoh pyntreikam ïa ka Shillong Smart City Ltd., ka Saubhagya Scheme bad halor ka bamsap thied kali da ka tnat Pulit.
Haba jubab ïa ka jingkren jong u Myntri Rangbah uba ong ba um treh satia ban ïatai nia bad ki khynnah rit, u Gokhale u la pynkynmaw u Myntri Rangbah ha ka jingïakynduh ha ka sngi bamja miet ha New Delhi ha kaba ki la ïakren sani ïa kiba bun ki mat.
U la ong ruh ba u dei u National Spokesperson jong ka Liang Pyrshah kaba wan baar ha ka jingbun paid ha ka Parliament.
U la buh jingkylli ruh ba balei ka Sorkar MDA ka kyiuh that that ban ïatai nia lada kim donkti ban leh ïa ki kam ki bym dei bad lada kim don eiei ban buhrieh.
“Ka dei tang ban ïa tai nia ka long tang halor ka jingbym biang ka synshar ka khadar ha Meghalaya, ha kaba, phim da donkam ban tip ïa nga,” u la ong.
Ha ka shithi, u Gokhale u la kdew ruh ba bun ki briew na ka National People’s Party (NPP) ki la pyrshang ban ai daw da kumne kumtai khnang ban lait na ka jingïatai nia halor ka jingbym hok shuh ka synshar ka khadar ha Meghalaya. kane ka kynthup wat ïa u MP ka Rajya Sabha uba long ruh u State President jong ka National People’s Party (NPP) u Dr. WR Kharlukhi.
U Gokhale ha ka shithi ba la thoh sha u Myntri Rangbah ka Jylla u la ong, “ngan ap ïa ka jubab jong phi bad buh ïa ka sngi ha kano kano ka por kaba phi sngewbit ha ka taiew ba nyngkong jong u bnai Risaw ban ïatai nia paidbah bad uno uno u Myntri ka Sorkar MDA uba phi jied pyrshah ïa nga.”
Shwa kane, u Gokhale u la kob ruh ïa u Symbud Myntri Rangbah u Bah Prestone Tynsong ban ïatai nia halor kane kajuh ka nongrim.
Ka Trinamool Congress ka la kynnoh ruh ba ka Sorkar MDA ka la pyrshang katba lah ban thaw ïa ki lad ki lynti ban ïai neh ha ka bor synshar ha ka jaka ban peitngor ïa ka jingbym biang ki jaka pule, ka jingkiew ki samla ba ïohkam, ka jingkhyllem ki jingtei hapoh ka jylla.
“Ka Meghalaya TMC kan ïai bteng ban long ka tynghung jong ki paidbah ka jylla Meghalaya,” la ong ka party.
Na ka liang u Myntri Rangbah ka jylla u Conrad K Sangma u la ong mynta ka sngi ba i dei i ei ine i Saket Gokhale ba i wan batai stad bad kob pia ban ïatai ñia ha kane ka jylla i tip aiu shaphang kane ka jylla Meghalaya.
U Myntri Rangbah u la ong “ I dei i ei ita i Gokhale, ngam tip satia ïa u, ki lah ban don bun ki briew kiba sah ha ki bynta bapher bapher ka ri India kiba lah ban wan sha kane ka jylla ban shu kob pia ban iatai ñia halor kino kino ki mat ruh ïa kaba ym lah ban pdiang satia”.
“ Ka sorkar kam don por ban ïatai ñia bad kino kino ki briew (Tom, Dick bad Harry) bad kam myntoi hi ruh ban ïa bun ktien namar ngam ithuh satia ïa u bad ngam don ei ei ban ïatai bad u.
U Gokhale u la kob ïatai ñia shwa ïa u myntri ka tnad PWD (Building) u ma Dasakhiat Lamare, hadien kane ula kob sa ïa u Symbud Myntri Rangbah bah Prestone Tynsong bad mynta ka sngi sa ïa u Myntri Rangbah u Conrad K Sangma. Kaba nyngkong halor ka jingkhyllem u Dome jongka Assembly ba thymmai ha Mawdiangdiang, hadien kane sa ka Shillong Smart City Project.
Hynrei u Myntri Rangbah u la kren shai ba ka sorkar kam don por ban ïa pynlut por ha kine ki kam kai namar ka dang don bun ki kam ban leh bad trei na ka bynta u paidbah khamtam sa tang katto katne bnai la poi ka election MLA 2023.