Hajuh ka Building ym don jingïasngewthuh jingmut, ba tyngkhuh tarik ka Exam DSC & MPSC
Jowai, Nailar 28: Ki MDC ka Voice of the People Party (VPP) jong ka JHADC mynta ka sngi Palei hapoh ka jingïalam u ma Awhai Andrew Shullai kila leit ban kynduh ïa u Deputy Commissioner uba dei ruh u Chairman jong ka District Selection Committee (DSC) ka West Jaiñtia Hills District, halor ka jingbym lah ban pynbeit ïa ka jingïatyngkhuh tarik ka Written Exam jong ka DSC bad ka Exam MPSC.
Haka jingkren sha ki lad pathai khubor hadien ka jingïakynduh ïa u DC na ka liang u ma Andrew Shullai ula ong ‘balei kam don satia ka jingïasngewthuh jingmut lang hapdeng ka DSC bad MPSC namar baroh ar tylli ka tnad treikam (cell) ki don haka juh ka Building jong ka ophis treikam u Deputy Commissioner, Jowai.
Na ka liang ki kynhun sengbhalang ruh dang ha kine ki sngi bala dep kila leit ban ujor ïa kane, hynrei na ka liang ki bor ba dei peit kim shem la lah satia ban pynbeit ïa ka, kumta hadien ka jingïoh ujor na kiba bun ki samla ba ïakhun ïa kine ki Exam, ka VPP kala mih shakhmat ban leit pynsngew biang ïa kane ka juh ka mat, khnang ba kan nym jia shuh nangne shakhmat, ong u ma Andrew.
Ula ong baroh ar tylli kine kam jong ka DSC ba MPSC ki long ki juh hi bad kiba ïakhun ïa ki dei kiba la pass Graduate bad u buh jingkylli balei pat ym lah ban pynïakhun da kiwei ki kyrdan kum ki Technical Line Courses kiba ïapher haka laiñ jingpule.
Katba u MDC ma Jamshaphrang Pohtam ula ong ka pyrthei mynta ka dei ka juk kyrduh kam kyrduh jam, kaba la pynlong ïa kiba bun ki khun samla wad kam ban ïakhun ïa kino kino ki kam tang ban ïoh.
“Lada ka sorkar ka plie lad na ka kti ka mon balei pat ka khanglad na ka kti ka diang”, kumba la paw ha kane ka jingïatyngkhuh tarik jong ka exam (DSC & MPSC), da kaba u ong ruh wat ailad ïa ka rukom thung kan long da kaba jakhlia hynrei ka dei ban long da kaba khuid ba suba.
Shuh shuh u kyntu jur khamtam ïa u Chairman ka DSC ban don ka jingïasngewthuh jingmut bad ban pyndonkam hok ïaka bor bad ka jingstad bala bynshet ha u na ka bynta kane ka kam.