Shillong, Nailar 31: Ki nongshet ja sngi na bynta ki khynnah skul kiba pynlong ïa ka jingïakhih da kaba shong sah miet ha khmat ka ophis treikam jong ka MBOSE Shillong, ban dawa na ka sorkar ba kan kyntiew ïa ka bainong shet ja kaba la kynjoh sha ka lai sngi lynter kaba ki la sdang naduh ka 29 tarik ha ka sngi Balang ki la rai ban leit phai ïing noh hadien ba ka sorkar lyngba u Commissioner Secretary u Dr BDR Tiwari bad u Director u Ambrose Ch Marak jong ka tnad pule puthi ka sorkar jylla ki la kular ba na ka liang ka sorkar kan pyrshang ban pynurlong noh shen ïa ka jingdawa kyntiew bainong ïa ki.
Haba kren bad ki lad pathai khubor hadien ba mih na ka jingïalang bad kine ki ar ngut ki heh sorkar u nongai buit ka All Jaintia Midday Meal Workers Union u Bah Khroo L Pariat u la ïathuh ba na ka liang ka sorkar ka la kular ban kyntiew ïa ka bainong jong ki nongshet kaba na ka liang ka sorkar jylla kaba ka ju siew tang 100 tyngka shibnai kan kyntiew sha ka 2000 bad ki nongshet kin ïoh bainong 3 hajar kynthup lang ïa kaba ki ïoh na ka sorkar pdeng. U la ïathuh ba ha kane ka jingïakynduh na ka liang kine ki ophisar ki la pyntip ba na ka liang ka tnad ruh ka la phah ïa kane ka jingtyrwa naduh ka 5 tarik Naitung bad ïa ka file la phah dha ka tnad pla tyngka bad ka planning ba kan leh ïa kaba donkam. Shuh shuh u la ïathuh ba na ka liang ka union ki ai por haduh u Naiwieng ïa ka sorkar ban pynurlong ïa ka jingkular kaba ka la ai bad lada kam bat ïa ka kular na ka liang jong ki kin pynlong da ka jingïakhih kaba kham tyngeh.
Haba ïadei bad ka jingdawa ba ka sorkar kan ai noh da ki tyndong lyer u bah Khroo u la ïathuh ba na ka liang ka sorkar kan pyrshang ban thaw ki lad ki lynti namar katkum ki kyndon ka Mid-day meal Scheme kam don satia ka kyndon na bynta ban ai da ki tyndong lyer shet. U la ïathuh ruh ba na ka liang ka sorkar jylla ka la kular ba kan sa pyrshang shuwa na ki skul ha sor ban ai tyndong lyer shet namar wat ha sor ki dang don ki skul kiba hap shet da ka dieng.
U la ïathuh ruh ba ka jingdawa kaba ki dawa ba ka sorkar kan ai bainong beit ïa ki nongshet ha ki bnai Nohpreh bad Kyllalyngkot na ka liang ka sorkar ka la kren shai ba ka kyndon jong kane ka skhim ka kdew shai ba ka sorkar kan siew tang 10 bnai hynrei wat la katta ruh ka sorkar kan pyrshang ban wad ïa ki lad ki lynti halor kane.
