Haduh u Kyllalyngkot ai bor ka ïingbishar ban pynïoh jaka shong dukan ki nongdie madan ha Laitumkhrah

Shillong, Nohprah 15 : Ka Iing Bishar High Court jongka jylla ka la bthah ban pynioh jaka shong dukan ia ki briew ba die dukan rud surok ha ki thaiñ Laitumkhrah hapoh u bnai Kyllalyngkot 2026.
ïa kane ka hukum la pynmih da ka division bench ba kynthup ïa u Chief Justice Soumen Sen bad Justice HS Thangkhiew ha ka 10 tarik Nohprah, hadien ba shimkhia ïa ki kam bala leh da ka Shillong Municipal Board.
“Halor ki kam bala leh bad ki jingpynpaw ha ka affidavit ba ïa ka jaka shong dukan ki nongdie madan lah khmih lynti ban pyndep hapoh ka taiew ba nyngkong u Kyllalyngkot, 2026, buh noh ïa kane ka kam ban shong bishar biang ha ka 28.01.2026. Ka Shillong Municipal Board ka dei ban nang ai shuh shuh ïa ka kaiphod ha ka dur jong ka affidavit ha kane ka sngi bishar” ong ka ïing Bishar.
La pyntip ïa ka ïing Bishar ba napdeng ki 43 tylli ki jingkam, 14 ngut ki nongdie dukan madan la kynthup ïa ki ha ka thup bala pynmih da ka Provisional Town Vending Committee (PTVC), bad sa 15 ngut ki nongdie dukan madan la shem ba ki dei shisha ki nongshong dukan madan bad la ai jingmut ban leh eiei na ka bynta ka jong ki.
Ka PTVC kala rai ban pyndep noh ïa ka thup ki nongshong dukan madan bad ka Sorkar ruh kala dep ban pynbna ïa ki jaka bala ithuh ban buh dukan madan.
Ka Sub-Committee kala pynkhreh ïa ka Standard Operating Procedure ban sngap ïa ki jingkam bad jingpyrshah ïa kiba aplai licence.