Haduh u Jymmang ai por ka Ïingkashari ban pyndep ka jingtohkit ba ïap u Pulit ka Assam ha NEPA

Shillong, Lber 22: Ka Meghalaya High Court ha ka sngi Thohdieng, ka la hukum ban pyndep noh ïa jingtohkit hapoh ka 31 tarik Jymmang halor ka jingïap khlem daw jong u Pulit ka Assam ba wan shah hikai pyntbit ha North Eastern Police Academy, Umïam.
Ka Ïingkashari ka shaïong ban ïohsngew ba wat hadien laisnem, ka jingtohkit kam pat dep satia, kumta, ym pat shym la file ïa ka chargesheet.
Ki bor pulit ki la pyntip ba ka jingtohkit ka dang ïai bteng bad pyntip ruh ba ka jingtohkit kam bymman ka la sdang.
Haba pynwai ïa ka writ petition ba la mudui da u Birendra Pandit, ka Kashari ba la khleh da u Chief Justice I Mukerji kala ong ba ka Ïingkashari kam don jingsngew satia ba kan tuklar ïa ka jingïaid ka jingtohkit kam bymman.
“Hynrei, haba peit ïa ki jingshisha jong kane ka mukotduma, ka Ïingkashari ka hukum ba ka jingtohkit ka dei ban dep noh hapoh ka 31 tarik Jymmang, 2025, ka ban lam sha ka jingfile ïa ka chargesheet hapoh ka Ïingkashari ba tian bishar,” ong ka Ïingkashari.
“Hadien kata, ka Ïingkashari ba tian bishar kan pynïaid ïa ka jingbishar katkum ka aiñ bad ban pyndep noh kloi katkum ka jingshah jong ka kam ka Ïingkashari,” ka la ong.
Lah ban kdew hangne ba kane ka jingjia ka la jia ha ka 9 tarik Lber, 2022. Katkum ka jingïathuh na kawei ka liang, une u Pulit ba wan na Assam u la ngam jyllop hapoh ka swimming pool jong ka Academy.
Hynrei katkum ka jingong ki bahaïing hasem kiba la ujor ïa ka ejahar, ki don haduh 29 ngut ki pulit hajan jong une u Pulit ba ïap ha ka por ba jia kane ka jingjia bad kumta kim lah satia ban pdiang ba un ïap ngam jyllop.