Haduh T. 9000 kiew tulop ki nonghikai Adhoc, 6000 tyngka ïa ki UP bad LP

Shillong, Naitung 04 : Ki nonghikai Adhoc jong ki skul shimet kiba don ha kylleng ka jylla kin sa ïoh tam haduh 9000 tyngka man u bnai hadien ba ka Kynhun Myntri ka la mynjur ba kyntiew noh ïa ka tulop jong ki ndauh u Naitung mynta u snem.
Kumban shu kdew hangne, ki nonghikai Adhoc hapoh ka lama jong ka FASTOM mynta la bun sngi ki la pynlong da ka jingïakhih ban dawa na ka bynta ban kyntiew noh ïa ka tulop jong ki.
Na ka liang u Myntri Rangbah ka Jylla, Conrad K Sangma haba kren bad ki lad pathai khubor hadien ka jingïalang jong ka kynhun Myntri u la ong, “Na bynta ki nonghikai Higher Secondary, Secondary bad nonghikai Science ka jingpynkiew tulop ka long, 9,000 tyngka katba na ka bynta ki Upper Primary, Lower Primary, nonghikai Hindi bad 4th teacher jong ka SSA, ka jingkyntiew tulop ka long 6,000 tyngka.”
Da katei ka rai jong ka kynhun Myntri, ki nonghikai Adhoc ha ki Higher Secondary mynta kin ïoh ka tulop kaba 33,000 tyngka shibnai, ki nonghikai Secondary kin ïoh 29,000 tyngka shi bnai bad ki nonghikai Science pat kin ïoh 31,000 tyngka shi bnai.
Haba ïadei pat bad ki nonghikai ha ki Upper Primary kin ïoh 22,000 tyngka shi bnai, ha ki Lower Primary 18,000 tyngka, nonghikai Hindi 18,000 tyngka bad ki 4th Teacher ha ki skul SSA pat kin ïoh 18,000 tyngka kumjuh.
“Ka jingpynlut na ka bynta kane ka jingsiew tulop man u snem kan long kumba 100 klur tyngka bad kane kan sdang naduh ka 01tarik u Naitung, 2022,” bynrap biang u Myntri Rangbah.
Haba ïadei pat bad ka jingdawa jong ki nonghikai ban don beit ka jingkyntiew tulop kaba 5 persen man u snem, na ka liang ka sorkar kam pat pdiang satia.
Da kaba pynshai pat halor ka jingdawa pynkiew kaba 5persen manu snem, u Myntri Rangbah u la ong ba kane ka shong ha ka bor jong ka Managing Committee namar haba ki lum ïa ka bai skul kim phah sha ka sorkar hynrei ki bat beit ma ki.
Tangba u ong pat ba katei ka jingai jong ka sorkar kadei namar ki shim ba ka pule puthi kadei kaba kongsan tam bad na kata ka daw ki la mynjur ïa katei ka jingdawa.
U Myntri Rangbah u la ong ruh ba na ka bynta ban pynkiew ïa ka tulop ki nonghikai, kin hap ban khate na bun ki projek kaba ka sorkar jylla ka thmu ban leh.
“Ngin ym lah shuh ban pynïaid shakhmat ïa ki projek ba ngi thmu ban leh. Ngi don bun ki projek kynthup naduh kito kiba dei ha ka tnad C&RD, ha ka tnad Police bad ruh wat ha ka tnad Pule Puthi ruh. Nga la dep ban mang haduh palat 100 klur tyngka na ka bynta ban tei ïa ki ïing skul thymmai bad kumba 150 klur tyngka pat na ka bynta ban pynbha ïa ki ïing skul jong ki skul Lower Primary jong ka sorkar da kaba ai mar 2-3 lak tyngka kawei kawei,” u la ong.
U Myntri Rangbah u la ong ruh ba ïa ka jinglut na bynta ka jingsiew tulop thymmai ïa ki nonghikai yn sa khate na ki tnad bapher bapher kynthup wat na ki kam pynroi ruh kaban poi la kumno kumno kumba 310 klur ha ka shisnem.