Nongstoiñ, Naiwieng 18: Ki jaka bad ki shnong ki thaw jong ka West Khasi Hills kiba don ha khappud bad ka Assam, ki dei ki jaka kiba shit bha bad ki paitbah nongshong shnong ha kitei ki jaka ki im da ka rep ka riang bad ki mar rep ba kongsan ki long u sying, synsar, kwai, tympew, u kba bad kiwei kiwei.
Ki jait dieng kiba rem dor bha kum u dieng teak, dieng sal, dieng rai bad kiwei kiwei ruh ki mih bha tang ba ka shim pur slem bha haduh ba kin da lah ban pynmih pisa. Hynrei don sa uwei pat u jait dieng u ba mih bha ha kitei ki jaka khappud u dei u dieng jri bad une u jait dieng u san kloi bha bad kiba pynmih pisa kloi ïa ki nongrep.
Haba phai pat ha West Khasi Hills u rangbah u ba la sdang nyngkong eh ban rep dieng jri u dei u (L) Bah Tomiwell Pangñiang na ka shnong Myndo kaba don harum jong ka shnong Umsohpieng bad hadien katto katne snem ki nongshong ha ki thaiñ khappud kum ha Mlangkone, Sildubi bad Madanjira ki la sdang ban rep dieng jri.
Kumta ban tip kham bha ha kaba ïadei ban ka jingrep ïa u dieng jri, ha ka sngi saitjaiñ ba la dep u nongthoh khubor, u la hiar sha kawei bri rep dieng jri kaba don ha ka shnong Madanjira bad la ïoh ban ïakynduh bad ïakren bniah bha bad u.
Ha kaba ïadei bad ka rukom rep ïa u dieng jri u nongrep u la ong ba ka shim por tang hynñiew haduh phra snem ban ïoh lum ïa ka jri naduh ka por ba dang sdang ban thung. Nalor kata u la ong ruh ba hadien ba ki dieng jri ki la sdang ban heh lah ban thung sa da u kwai hapoh jong ka khlaw dieng jri. U nongrep u la don ruh la ka mashin saiñ jri ba ladep lum na ki bul ba ki la pdiang ha ka por ba ki ot.
Ha ka khlaw thung dieng jri jong u nongrep, la lap ruh ba da ki hajar tylli ki dieng jri kiba u la rep bad la long kum ka khlaw kaba rben bha. Haba kylli pat ba kawei ka tynrai dieng ka lah ban pynmih haduh katno kilo, u la ong ba ha ka shisien ot lai tynrai ki dieng lah ban pynmih kumba shi kilo ka jri, namar ba ki don kiba ka um jri ka mih bha bad ki don pat ki tynrai dieng ki bym da mih bha.
Nalor kata u la ong ruh ba ha ka shi snem ka por ban sangeh ban lum jri ka dei tang ar bnai kata ha u Lber bad Ïaïong, namarba ki dei ki bnai ba ki dieng ki dang sei sla lung kumta lada ot ki dieng ki ring tyrkhong noh.
Haba kylli pat ba ha ka dor katno u ju pynïaid ïew ïa ka jri, u la ong ba mynta u snem ka dor ka poi tang arspah tyngka shi kilo. Hynrei lada dei ki snem ba ka ïew ka biang bha lei lei ka dor ka poi lai haduh saw spah tyngka shi kilo.
Watla katta ruh u la ong ba u lah ban kamai haduh T1.50 lak ha ka shi taïew na ka ba die ia ka jri.
