Haduh saw tylli ki Division thymmai, ka Shillong South sha Pynursla

Shillong, Nohprah 09 : Ka sorkar jylla ka la thmu ban pynkha haduh saw tylli ki PWD Division na ka bynta ban pynsuk ïa ka rukom treikam kiba ïadei bad katei ka tnad ba peit ïa ki lynti syngkien ha ka jylla.
Kitei ki Division ba thymmai ki kynthup ïa ka Dadenggre bad Kharkutta ha rilum Garo katba ha rilum Khasi pat ki kynthup ïa ka Mawshynrut bad kynthup lang ïa ka Mawphlang Division kaba la plie paidbah ha kane ka sngi Thohdieng ha Mawphlang.
Ïa kane la pynbna da u Symbud Myntri Rangbah ka Jylla, Bah Prestone Tynsong ha ka jingïalang plie ïa ka ophis treikam jong u Executive Engineer PWD (Roads) Mawphlang Division, ha Mawphlang ha kane ka sngi Thohdieng.
“Kane ka Division kam dei satia kaba kyntiew kyrdan hynrei kadei beit ka Division kaba thymmai namar ki Sub Division kiba rim kiba don hangtei bad kawei pat ha Sohïong kin treikam beit kumjuh,” u la ong.
Nalorkata, u ïathuh ruh ba ka jingwanrah da ka Division kan long ka jingmyntoi kaba khraw ïa ki paidbah khamtam ïa ki kontraktor namar kim donkam shuh ban leit lut sha Shillong na ka bynta ki kam jong ki khamtam ha kum kane ka por ba jur ka dheng kali.
“Kadei ka thong jong kane ka sorkar ba ïa ka jingshakri yn pynjan sha u paidbah da kaba rah ïa ki ophis treikam ha kylleng ki bynta jong ka jylla,” u la bynrap shuh.
U Bah Prestone u la ong ruh ba ki la mih bun ki jingkynthoh ba kane ka sorkar MDA ba ïalam da u Conrad bad Bah Prestone ki dei tang ki nongpynbiej elekshon da kaba buh mawnongrim. “Nga kwah ban pynshai hangne ba une uba plie mynta ha Mawphlang Division un neh pateng la pateng bad kane ka ophis kan treikam pura naduh u Kyllalyngkot jong u snem ban wan namar ïa mynta yn ailad shwa ban pyndep ïa ki kam barim,” u la bynrap biang.
Nalorkata, u la ong ruh ba kadei ka jingshisha ba ka jingurlong katei ka Division kadei da ka jingbuh kyndon jong ki arngut ki rangbah kata u MDC ka thaiñ Bah Lamphrang Blah bad ruh u Bah Kennedy Khyriem ha shwa ba kin wan ban pynïasoh sha ka NPP.
“Kumta da ka jingdon kane ka ophis phim donkam shuh ban leit shaduh Shilllong namar ïa ki kam baroh la lah ban leh hangne,” u ong da kaba bynrap ba kane ka Division kan peit haduh 380 KM ka jingjrong ka surok.
Shwa kane, u MLA ka Sohïong u la ai ka jingïaroh ïa ka sorkar jylla hapoh ka jingïalam jong u Conrad bad Bah Prestone kiba la ïakhun borbah na ka bynta ban kyntiew ïa ka roi ka pa khamtam eh ban pynïoh ia ki surok kiba bha.
Ha kane ka sngi la ïoh ruh ïa ka jingkren na u MLA ka thaiñ Bah Eugeneson Lyngdoh, MDC ka thaiñ, Bah Lamphrang Blah nalor ka jingdonlang u Bah Sherbor Mawlong Sohïong, Bah K K Mawa, Chief Engineer, PWD (Roads), Bah S Kyndiah, Superintending Engineer, PWD (Roads), Eastern Circle, Bah W Rilang Lyngdoh, Executive Engineer, PWD (Roads), Shillong South Division, ki nongïalam ka Hima Mawphlang bad kiwei kiwei.