Haduh mynta ym pat ïoh ïa ka kaiphod post-mortem ba khatduh jong u Home Guard ba ïap ha Assam

Shillong, Nailur, 09: U Myntri ka Sorkar Jylla uba khmih ïa ka tnad Civil Defence & Home Guards u Bah Comingone Ymbon u la pyntip hapoh ka Iingdorbar ba ka kaiphod post-mortem kaba khatduh halor ka jingïap jong uwei u Pulit Home guard ha Assam kam pat dep haduh kine ki sngi.
Ïa u (L) Ribokson Dkhar Sawian u la lap ba u la ïap ha ka por ba u dang don hapdeng ka jingshah hikai pyntbit jong ka National Disaster Response Force (NDRF) Training Institute ha Guwahati, Assam.
Kane ka la jia ha ka 9 tarik, Ïaiong, 2025, katba u Bah Sawian u dang don ha ka Basic Disaster Management Course.
Haba jubab ïa ka Call Attention Notice ba la wanrah da u MLA ka VPP na Mawryngkneng u Bah H. Kharpran hapoh ka Iingdorbar, u Bah Ymbon u la ong, “ha ka 11.08.2025, ki bahaiing ki la kyrpad ïa ka ophis jong u District Training Centre Home Guards, East Khasi Hills ban ïakren kane ka kam bad ki Pulit jong ka North Guwahati ban ai ïa ka Clearance Certificate bad ban phah ïa ka sha ka AIIMS Guwahati na ka bynta ban ïoh ïa ka kaiphod post mortem ba khatduh.
Katkum kane, ka ophis ka la thoh sha u ophisar ba dei peit ïa ka North Guwahati Outpost ha ka 22.08.2025 ban ai ïa ka jingbit khnang ba ïa kajuh yn lah ban aiti ha AIIMS hospital, Guwahati bad ba ïa ka Post Mortem ba khatduh yn lah ban shimti da ki bahaïing jong u Pulit Home Guard uba la khlad noh.”
“Hynrei la pyntip sha ka District Training Centre Home Guards, East Khasi Hills ba ka kaiphod post mortem kaba khatduh kam pat dep haduh kine ki sngi,” u la bynrap.
U Myntri u la pyntip ba ka ophis jong ka District Training Centre Home Guards, East Khasi Hills ka la ïarap ïa ki bahaiing hasem jong une u Pulit Home Guard uba la khlad noh ban ïoh ïa ka Death Certificate bad kumjuh ruh ïa ka kaiphod Preliminary Post Mortem. Ha ka 18.06.2025 la aiti ïa ka Death Certificate bad ïa ka kaiphod post mortem sha ki bahaiing hasem jong u (L) Ribokson Dkhar Sawian.
“Tang shu ïoh ïa ka Death Certificate jong u (L) Ribokson Dkhar Sawian ka ophis jong u District Training Centre Commandant, East Khasi Hills ka la pyntreikam marmar ïa ka Leave Encashment kaba la kot sha ka T. 1,49,795 lak ïa kaba la ai sha ka kurim jong u ka Kong Evalyne Lamare ha ka 8.07.2019,” ula ong.
“Hynrei, ïa ka jingnoh synniang jong ka NPS ym shym la lah ban ai sha ka tnga jong u namarba u la jied ïa ka khun jong u kaba dang rit ka rta. Katkum ki jingbthah ba la ïoh na ka ophis jong ka Treasury Office ki don katto katne ki kot ki sla kum ka Pan Card, ka Aadhar Card bad ki jingtip ba bniah ha ka Bank jong ka khun kynthei ba dang rit ka rta kiba dei ban aiti sha ka ophis jong ka Treasury Office ban pyntip ïa ka kurim jong u (L) Ribokson Dkhar Sawian ban pynbiang kloi ïa ki kot ki sla kiba donkam,” la bynrap shuh shuh u Bah Ymbon.
Katkum ka jingïathuh jong u Myntri, ïa u Bah Sawian la ïohi khatduh ba u leit sha kamra sum ban sum ha ka por kumba 7:00 baje mynmiet ha ka 9 tarik, Ïaiong,. Hynrei ym shym la wan phai shuh sha ktem sah bad ki paralok ki la sdang ban wad ïa u, kaba bteng haduh ka step jong ka sngi kaba bud.
Wat hapdeng ka jingtrei shitom, ym shym la lap satia ïa ka met jong u Bah Sawian tad haduh ban da lap ïa ka met jong u da ki Pulit na Gauripur Police Outpost.
Ka kynhun jong ka District Training Centre Home Guards, East Khasi Hills ka la leit sha thanad jong ki Pulit ha Changsari bad hadien la ithuh ïa ka metïap jong u Sawian ha GNRC Hospital. Ynda la pyndep ïa ka Post-mortem la aiti noh ïa ka metïap sha ki bahaïing hasem bad la pynkit noh ïa ka met sha ïing sah ha Mawryngkneng.