Haduh mynta ym pat ïoh ban thied snam na Pharmacy: ong u ma A War

Jowai, Ïaïong 02: Kawei na ki kynhun treimon sngewbha jong ki 11 ngut shi paralok napoh ka Shnong Panaliar, Jowai kaba la tip kum ka ‘Sarot I Man’, mynta ka sngi 2 tarik u Ïaïong kala pynlong ïa ka prokram synñiang snam ha “Blood Donation” ha Jowai Blood Bank.
Hashwa kane la don ka jingïalang ba lyngkot ha kaba la ïoh ruh ka jingkren na ka Dr. Patricia Shylla, Medical Officer i/c Jowai Blood Bank, kumjuh na u ma Aziz War, dkhot ka Group, katba ïa ka jingïalang la pynïaid da u ma Jait dao Sumer, ha ryngkat ka jingdonlang ki dkhot ka Group SIM bad ki nongtrei ka Blood Bank.
Na ka liang ka Shylla haba ai jingkren kala ai ka jingïaroh ïa ka kynhuh ‘Sarot I Man’, kumba la tip ba kane ka kynhun ka don tang katto katne ngut ki dkhot hynrei kala shim pat ïa kane ka bynta kaba kongsan eh ban ïarap lem ïa ki para briew.
Shuh shuh kala batai shaphang kino ki briew kiba lah ban ai snam bad ïa kino ki bym lah ban ai hadien ba la dep ban test ïa ki jingdonkam baroh, kala pynsngew ruh ba ka jingai snam ka dei kawei na ki lad ban pynkhuid ïa ka met ka phat jong u briew.
Halor kane ka kyntu ïa kiwei de ban mih shakhmat da kaba bud ïa kane ka nuksa ba bha jong ka kynhun ‘Sarot I Man’ namar ka jingdon kum kine ki kynhun synñiang snam ne ki ‘Valuntary Blood Donors’, ka lah ban pynlait im ïa ki briew kiba donkam snam kyrkieh.
Ha ka juh ka por kala ïathuh ruh shaphang ka jingpang AIDS bad HIV, da kaba batai kumno kane ka jingpang ka ïabit na uwei u briew sha kiwei pat.
U ma A. War ha ka jingkren ula ong ba ka snam ka dei ka bynta kaba kongsan hapoh ka met ka phat jong ka jingim briew bad ka Blood Circulation ka ïarap ruh ban wanrah ïa ka oxygen hapoh ka met jong u briew.
“Wat ha ka jingstad jong u briew ha kine ki sngi ba mynta kum ka Science & Technology hynrei ïa ka snam ym pat lah ban shna ïa ka bad ‘ym pat don ruh kiba die ïa ka sha ki Pharmacy ne ki dukan dawai”, ong u ma War.
La pynsngew ba ka kynhun ‘Sarot I Man’ kala dep ban leh shibun ki kam ban shynñiah ha ka imlang ka sahlang da kaba pynkynmaw ba ha u snem 2021 kane ka kynhun ka la ïoh ban synniang snam ha ka 17.04.2021. Na ka liang ka kynhun ka dap da ka jingsngewkmen ba ka la ïoh lad biang sa shisien ban pynlong ïa kane ka juh ka prokram synñiang snam, la pyntip ba ka kynhun kan dang bteng nangne shakhmat ban leh ïa ki kam ba bha.
Katba ïa ki kyntien ai khubei la ïoh na u ma Jait dao Sumer, uba la pynsngew ryngkat bad u ki don sa kine ki riew rangbah kiba don bynta ban synñiang snam kiba kynthup ïa u Oliver Shadap Passah, u Anthony Challam, u Wombai Sumer, u Kyllimot Lhuid bad u Ram Sumer.