Haduh mynta 18 tylli ki metiap la sei na krem dewïong be-aiñ ha East Jaintia Hills

Shillong, Rymphang 05 : Ka jingïap ki briew na ka jingbthei ka krem dewiong beaiñ ha Mynsyngat,Thangsko ha East Jaintia Hills ha ka step sngi Palei ka la kiew mynta sha ka 18 ngut tad haduh ba thoh ïa kane ka khubor.
“Kane ka jingbthei ka krem dewïong kaba don kumba 25KM ei ei na district headquarter ka la jia kumba 11baje ei ei mynstep bad haduh mynta ki la don haduh 18 ngut ki briew kiba ïap bad uwei uba mynsaw ïa uba la pynkit mardor sha jaka ai jingsumar,” la ïathuh u Myntri Rangbah haba kren bad ki lad pathai khubor.
Da kaba pyntip ba mardor ki bor ai jingïarap kynthup naduh ka kynhun na ka National Disaster Response Force (NDRF) bad State Disaster Response Force (SDRF) nalor ki pulit ka Jylla ki la poi mardor sha katei ka jaka, u Myntri Rangbah u la ïathuh ba ka sorkar jylla ka la phah ïa ki arngut ki Myntri Sorkar ba kynthup ïa u Bah Lahkmen Rymbui bad Bah Wailad Shylla ban leit sha katei ka jaka ba jia ban ïoh ïa ka jingtip kaba kham bniah shuh shuh.
“Na ka liang ki Symbud Myntri Rangbah ryngkat bad nga ngin buddien ïa kane ka kam bad ki bor distrik, ki tnad sorkar bad ki bor pulit bad bthah ruh ïa ki pulit ba kin leh da kaba tyngeh ïa kito kiba donkti halor katei ka jingjia kaba jia mynta ka sngi,” u la ong.
U Myntri Rangbah u ong ba watla baroh ki tip ba ha ka jylla ki la sdang ïa ka jingtih dewiong da ka juk thymmai ne ka scientific mining, kumta u ong ba baroh kiba tih dewiong ki hap ban da ïoh jingbit bad ka lad ka don naba ym shah shuh ban leh ïa kino kino ki kam beain kiba buh jingma ïa ka jingim ki nongtrei.
Halor kane ka jingjia na ka liang u Myntri Rangbahduh ka Ri, u Narendra Modi u la phah ka jingsngewlem sha ki lanot ha katei ka jingjia bad pynbna ruh ïa ka bai luksan kaba mar 2lak sha kiba khlad bad 50 hajar tyngka pat sha kiba mynsaw na ka Prime Minister’s National Relief Fund (PMNRF)
Ha kajuh ka por u Myntri Rangbah u la pynbna ba ka sorkar jylla kan ai 3lak tyngka marwei ka bailuksan sha kiba khlad ha kane ka jingjia.
Katkum ka kyrwoh na u Superintendent of Police ka East Jaiñtia Hills District, u Vikash Kumar IPS u la pyntip ba ïa uba mynsaw ha kane ka jingjia la rah noh ïa u na CHC Sutnga sha ka jaka sumar sha Shillong.
“Ka jingwad ka dang bteng haduh mynta ïoh dang don shuh kiba dang sahkut shapoh,” la ong u SP.