Haduh kjat u Lum Shyllong pynpoi surok u Bah Sanbor ha Riat Laban Kynjat Phutbol bad Madan Laban

Shillong, Nailar 16 : Ka la dei ka sngi kaba kmen bha ïa ki nongshong shnong jong ka Riat Laban Kynjat Phutbol namar hadien ka jingkhmih lynti kaba la slem khatduh ki la ïohi ïa ka surok ba kan poi shaduh ka shnong jong ki kaba don ha kjat jong u Lum Shyllong.
Ïa kane ka surok kaba la shna bha da dewbilat la plie paidbah da u MLA ka thain Bah Sanbor Shullai ryngkat ka jingdonlang u Assistant Executive Engineer Bah N Lyngdoh, Additional Deputy Commissioner Kong Dolly Kharmalki, Bah Wallambok Khongwir Vice Chairman MTDC, kiwei ki ophisar kumjuh u Rangbah Shnong Bah Shaiphar K Wahlang bad ki nongïalam shnong na ka shnong ba marjan.
Ïa kane ka surok la tei ha ka jinglut kaba kot sha ka 57lak tyngka bad ka la don ruh ka jingtyrwa ba nangne pat yn dang bteng biang ban shna ha ka kylla kaba bud .
U Bah Sanbor haba kren ha kane ka sngi u la ïathuh ruh ba shen kane ka thain kan sa ïoh ruh ïa ka madan phutbol kaba paka kaba yn pynïasoh da ka surok kaban shna ha ka kylla kaba ar.
Ha kajuh ka por u la pyntip ruh ba ïa katei ka ïing dorbar kaba rim yn sa pynpra noh bad tei thymmai da Cultural Centre kaba lai mala kaban don lang naduh ka jaka ieng kali, ka community hall ha ka mala kaba ar katba ha ka mala kaba lai pat la mang ban buh ïa ka ophis treikam jong ka Dorbar Shnong, jong ka Seng Kynthei nangta na bynta ki samla bad kiwei kiwei.
Shwa kane u Bah Sanbor u la plie ïa ka surok thymmai kaba pynïasoh na jan ka surok markhap bad ka community hall Madan Laban pat mih pat sha Khlaw Laban (Laban Forest) ba la shna ha ka jinglut ba 83.70 lak tyngka.
Katkum ka jingïathuh da u Rangbah Shnong Bah Iostar Sunn ïa kane ka surok la shna ha ka jaka ïaid kjat kaba rit bha hynrei mynta pat ka la kylla kum ka lynti ïaid kali kaba la pynkmen haduh katta katta ïa ki nongshong shnong.
Na ka liang u Bah Sanbor pat u la ïathuh ba ha ka kylla kaba ar ki don ka jingthmu ban pynpoi surok haduh ban da kynduh ïa ka surok kali kaba don ha ki bynta ba shatei jong kane ka thain.
Ha kane kajuh ka sngi u Bah Sanbor u la leit ruh ban plie ïa ka jaka sum bad ka jaka leit bar kaba u la phah shna kyrpang na ka bynta ki nongsait jain jong ka shnong Rïat Laban Kynjat Phutbol.