Haduh Barik Point kular u Gadkari hakhmat u CM bad DyCM ban pynpoi ïa ka Fly-Over

Shillong, Nohprah 18 : Ka Fly-over na Umshyrpi haduh Anjalee Petrol Pump kaba baroh ki khmih lynti ba kan ieng noh kham kloi ha nongbah Shillong kan poi mynta haduh Barik Point hadien ka jingleit kynduh jong u Myntri Rangbah Conrad K Sangma ryngkat u Symbud Myntri Rangbah ka Jylla Bah Prestone Tynsong dang shen ïa u Myntri ka tnad Road Transport and Highway (MORTH) ka sorkar podeng, u Nitin Gadkari dang shen ha nongbah Shillong.
Haba pyntip ïa kane ha ki lad pathai khubor, u Symbud Myntri Rangbah, Bah Prestone Tynsong u la ïathuh ba ha ka jingïakren halor ka ishu fly-over ha nongbah Shillong na ka liang u Myntri ula kular ba ïa kane yn pynpoi haduh Barik Point.
“Halor kane, u la bthah ïa ki ophisar ka NHIDCL bad na ka liang ka Ministry ba kin pynstet katba lah ban shimkhia ïa kane ka kam khamtam kaba bun na kane ka jaka kadei kaba hap ha jong ki shipai. Tang mar ïa ïoh ïa ka jaka kin khot tender bad sdaang ïa ka jingshna ïa kane ka flyover kaban kut haduh Barik Point.”
U Bah Prestone u la ong ruh ba tang shu dep kane ka flyover, ka leit ka wan ki kali bad kumjuh ka dheng kali kan sa duna ha nongbah Shillong baorh kawei.
Ha kajuh ka por u la ïathuh ruh ba ki la ïakren halor ka surok High Speed Corridor kaban sdang naduh Umïam sha Malidor bad kan mih ter ter shaduh Assam.
“Halor kane, na ka liang u Myntri u la kyntu ban pynstet noh katba lah ïa ka sorbe khnang ba yn lah pyndep noh ïa ka Detailed Project Report (DPR) ban ïoh khot tender noh kham kloi khnang ba kan pynsuk ïa ka jylla Meghalaya bad kumjuh ïa ka Jylla Assam kaban pynïasoh shaduh Silchar bad mih lyngba haduh Tripura bad kumjuh shaduh Mizoram,” u la ong.
Shuh shuh u la ïathuh ba na ka liang ka sorkar jylla ki la ai ka jingkular ba kin pynstet ïa kane ka kam khnang ba ka jingmyntoi kan dei ïa ka jylla khamtam haba ïadei bad ka ïoh ka kot jong ka jylla hi baroh kawei.
U Symbud Myntri Rangbah u la ïathuh ruh ba ki la ïa kren ïa ka surok ha Phulbari khamtam haba ïadei bad ka jingkieng heh na Brahmaputra kaban poi ha Phulbari bad nangne pat kan poi ka surok fourlane kaban pynïasoh ïa ka West Bengal bad ki bynta ri thor ha Garo Hills. U la ïathuh ba kane ka jingkieng kan dei ruh kaba jrong tam ha Ri India.
“Mynta kane la jan dep bad kan poi ha Phulbari bad nangne pat ka jingeh ka long ba ki kali kiba wan na West Bengal kin ïaid lyngba ka jingkieng bad kin wan sha Assam. Kaba ngi kyrpad mangi na u Myntri ka long ba un pynkylla fourlane ym dei ban kut tang ha Phulbari hynrei ban pynkut haduh Agia kaba dei ka khappud hapdeng ka Meghalaya bad Assam,” u la bynrap biang.
U ong ruh ba lada leh fourlane ïa katei ka bynta kaba don kumba 56 – 60 kilometer ei ei ka jingmyntoi kan dei kaba khraw ïa ka Meghalaya bad kumjuh ïa ka Assam.
Halor kane, u la ïathuh ba na ka liang u Myntri u la bthah ïa u Secretary ka Ministry of Road Transport bad kumjuh sha ki ophisar ba kin peit bniah ïa kane ka bynta.
La ïathuh ruh ba ki la pynsngew ruh ha u Myntri ba kin thaw ïa ki lad ki lynti ban lah shna pyndep ïa ki surok ka skhim Special Accelerated Road Development Programme-NE (SARDP-NE) kiba sahteng ha Jylla namar ka jingpynkut ïa ka skhim.
Katkum ka jingïathuh da u Symbud Myntri Rangbah u pyntip ba ka Sorkar Pdeng kala pynkut noh ïa ka skhim SARDP-NE bad kane kala buh ha ka jingeh ïa ka Jylla ba kan lah trei pyndep ïa ki artylli ki project surok jong kane ka skhim-ka surok Nongstoin-Wahkaji-Phlangdiloin-Ranikor bad kawei pat kadei ka surok Nongstoin-Rambrai-Kyrshai ka ban pynïasoh bad ka Chegaon, Assam.
U Bah Prestone u pyntip ba ïa ka wat ba nyngkong jong kine ki project lah dep ban pyntrei hynrei dei ha ka wat ka ba-ar kaba sah namar ka jingpynkut noh ïa ka SARPD.
“Ngi la kyrpad ïa u Myntri ka Sorkar Pdeng ban pynrung noh ïa kitei ki artylli ki project ha kano kano ka skhim khnang ban ïoh shna pyndep noh-ki ban ai shibun ki jingmyntoi bad pynsuk ïa ka leit ka wan ki paidbah. Halor kane u Myntri u la ai ka jingkular ban sa wad ïa ki lad ki lynti ban pynïoh skhim ba kyrpang ïa kine ki artylli ki surok.”