Haduh ban da ïoh mihkhmat ïa ka Meghalaya ïakhun ki samla hapdeng ka kam bylla

Shillong Ïaiong 09: Ka jingïalehkai Kayaking ne ka jingking lieng ha Meghalaya watla kam pat dei kaba pawnam tam hynrei kane ka jingïalehkai kala sdang ban suhthied da ka jingmih shakhmat jong ki samla ban leh Kayaking ha ka Wah Umtrew, Ri Bhoi District.
Da ka jingshimkhia jong ka Ri Bhoi Water Sports and Tourism Cooperative Society Ltd, Umtham ban kyntiew ïa ka jingïalehkai Kayaking, bun ki samla shynrang kiba don ïa ka jingsngewtynnad ban king lieng ki la mih shakhmat ban ïoh ïa ka jinghikai kaba kyrpang ban kinglieng ha ki lat lat bad ki jaka ba khongwaiñ bha.
Katei ka kynhun hapoh ka jingïalam jong u Ian Vincent kum u coach, ka la sdang ban ai jinghikai ïa kito ki samla kiba don ka jingthrang ban nang ïa katei ka kinglieng watla ki ïoh por tang khyndiat ban hikai.
Hynrei namar ka jingdon ïa ka mon ba jwat ryngkat ka lyngkor kaba tynrong ha ki tyrpeng jong ki, ki la lah ban ïakhun ïa ki raieh raidam ban king ïa ki lieng bad mynta ki la long kiba tbit bha ha kane ka jingïalehkai.
Ha u bnai ba la dep, 5 ngut ki samla na ka jylla kila leit ïashimbynta haka 15th National Rafting Championship kaba la long ha Arunachal Pradesh ha ka Wah Siang kaba hap ha Yingkiong (Upper Siang District) bad ha Pasighat (East Siang District) naduh ka 5 tarik u Lber haduh ka 12 tarik u Lber hi.
Watla kine ki samla shynrang ka jylla, baroh shi katta ki la leh ïa ka Kayaking hynrei kane kadei ka sien kaba nyngkong pat ïa ki ban leh ïa ka Rafting ha kaban king lieng kum ka kynhun bad ka jingleit ïashimbynta ka jongki kadei ban kin sngewthuh khambha ïa ka rukom king lieng ha kiwei pat ki wah kiba heh.
Ki samla kiba la leit ïashimbynta ha katei ka jingïakob ki kynthup ïa u Banjop Ïawphniaw, Kobek Mawnai, Robert Dkhar, Pynshngain Kurbah bad u Gilbert Kharkrang hynrei watla kim shym la jop ïa ka jingïakob hynrei kila pyni pat ïa la ka sap hakhmat jong kiwei pat, ba ha ka sien kaba nyngkong ban ïohi bad ban shong ïa ki lieng Rafting ki la lah ban king ïa katei ka lieng da kaba shu shim kylliang na kiwei pat ki nongïashimbynta ha ka jingïakob.
Kine ki samla ki la ïoh ban ïashimbynta ha katei ka Rafting Competition kum ka jingpyrshang ha ka sien kaba nyngkong, kadei lyngba ka kyrshan jong ka Meghalayan Age Ltd bad ki nongpynïaid jong katei ka Competition kila jied ruh ar ngut na ki samla ka jylla ban long kum ki Safety Kayakers ha katei ka jingïakob.
Haba ïakren bad kine ki samla, kaba la pynshaïong ka long ba kim dei satia ki samla kiba wan na ka longïing kaba don ba em, hynrei 4 ngut napdeng jongki kidei tang kiba kamai jakpoh da kaba trei bylla katba uwei pat udei uba dang pule ha ka klas IX.
Kine ki samla ki la ong, ba ki thrang shisha ba kin kiew ha ka jingïalehkai Kayaking hynrei namar ba ki hap ban bylla sngi kumta ki ïoh jinghikai tang 2 sngi haka shi taiew bad kila ong ruh ba ki tiar ki tar ha ka Kayaking bad Rafting ki long kiba rem bad ki donkam ïa ka jingkyrshan bad jingïarap khnang ba kin ïoh ban pyntbit ïalade bad ban wanrah nam bad burom ïa ka jylla ha katei ka jait jingïalehkai kaba kham pher.
Kine ki samla kila pynpaw ruh ba ki kwah ba kane ka jait jingïalehkai kan kiew bad kan paw bha ha ka jylla khnang ba kan long ruh kum ka lad ïa ki ban kamai jakpoh.
Nalor kane, ka jylla ka don ruh tang ïa kawei ka kynthei kaba leh ïa ka Kayaking kaba la tip kum ka Elizabeth Rose Vincent bad kala leit ban ïashimbynta ha ki jingïakob bapher bapher bad ka la wanrah nam ruh ïa ka jylla.
Kum shi bynta ban ai mynsiem ïa kine ki samla shynrnag kiba la leit ïakhun ha ka National Rafting Competition ban mihkhmat ïa ka jylla Meghalaya, ka Ri Bhoi Water Sports and Tourism Cooperative Society Ltd, Umtham ha ka 2 tarik u Ïaiong kala pynkup burom ïa ki 5 ngut ki samla shynrang Kayaking ha ka jingïalang kaba la long ha White Water Village.
Ïa kine ki nongking lieng la pynkup burom da u Producer jong u PCN u Bah BR Blah ha kaba la ïadonlang ka Kong Ibarilin Kharsati kaba long ka Chairperson jong ka Ri Bhoi Water Sports and Tourism Cooperative Society Ltd, Umtham, ka Secretary ka Sheela Jacob Vincent bad kiwei kiwei.