Jowai, Jylliew 15: Ka jingïalehkai phutbol jong ki khynnah skul ne ka ‘Inter School Subroto Cup Football Tournament- 2022’ bala pynïaid da ka ophis u District Sports Officer West Jaiñtia Hills District, Jowai kala la long mynta ka sngi 15 tarik ha madan Kiang Nangbah Stadium, Jowai.
Haba phai sha ka jingïalehkai ‘Pre Quarter’ jong ka kyrdan Under-17 ki khynnah shynrang la wan ban ïakhun nyngkong da ka Kiang Nangbah H/S School kaba la jop da 4-3 kol ïa ka Amlarem Secondary School, ka Little Flower H/S School Ummulong kala jop da 4-1 kol ïa ka Jowai Presbyterian H/S School. Katba ka H.K Singh Memorial Secondary School ka la jop da 2-1 kol ïa ka Amwi Thangbuli H/S School.
Katba ha ka kyrdan Under-14 ki shynrang ka J.N.M Secondary School Lamin kala jop 9-1 kol ïa ka Ches Star Secondary School, ka R.C Eve Secondary School Mihmyntdu kala pynliem ïa ka Govt. Public School da 5-0 kol bad ka H.K Singh Memorial Secondary School kala jop 3-2 kol ïa ka Demthring Presbyterian Secondary School.
