Shillong, Nailar 26 : Ka Smit SC ka la lah ban pynliem haduh 9-1 kol ïa ka Umphyrnai SC ha ka lympung ïalehkai jong ka SSA 2nd Division Football League 2025 kaba long ha kane ka sngi Ba-ar ha madan SSA, Polo Shillong.
Haba phai sha ka jingïakhun dei ka Umphyrnai kaba ïoh ban pynkhih jar nyngkong tang ha ka minit kaba 10 jong ka kylla step lyngba u Teibor Nongrum. Hynrei tang hadien san minit ka Smit ka la ïoh ban pynphai noh lyngba u Samlanghaki Warlalpih ha ka minit kaba 15 ban pynïakhaid ïa ka jingïakhun mar 1-1 kol.
Dei hadien kumba shi minit ei ei ka Smit ka la ïoh biang sa shi kol na utei u rangïalehkai uba la ïoh ban pynkhih jar biang ha ka minit kaba 16.
Hadien kane, ka Smit ka la nang nion tyngeh bad dei ha ka minit kaba 46 ba u rangïalehkai jong ka Umphyrnai SC u la kum bakla thep hi sha kol lajong ha ka minit kaba 46.
Mar ïa ïoh lamkhmat 3-1 kol, ka Smit ka la nang ïai ban tyngeh bad kumta dei ha ka minit kaba 54 bad kumjuh ha ka minit kaba 59 u rangïalehkai shakhmat ka kynhun u Nathaniel Kharbyngar u la ïoh ban thep sa ar kol na ka bynta ka kynhun. Kane kam pat kut satia bad dei ha ka minti kaba 66 bad 84 ba u Bhakupar Rynjah u la ïoh ban pynbud lang sa ar kol. Katba ïa ki ar tylli kiwei pat ki kol la ïoh ban thep da u Pynshngainborlang Nongrum ha ka minit kaba 68 bad ïa kawei pat da u Banmonbha Mawlong ha ka minit kaba 80.
