Shillong, Nailur 10 : Ki shipai BSF Meghalaya ha ka 09tarik mynta u bnai da ka jingtreilang bad ki pulit ka jylla ki la ïoh ban kurup shibun bha ki dawai, ki jain bad ki dur ïit kiba shongdor haduh kumba 88 lak tyngka kiba thmu ban leit shalan beain sha Bangladesh na ka khappud kaba don ha South West Khasi Hills.
Katkum ka kyrwoh na ki BSF la ong ba ka kynhun jong ka 193 Bn, ryngkat ka kynhun jong ki pulit Meghalaya ki la ïoh ban bat noh ïa ki ar tylli ki bolero pickup hajan khappud Gumaghat.
La ïathuh ruh ba kitei ki kali ki kit shibun ki dawai, ki sari bad ki dur ïit kiba thmu ban khaii sha Bangladesh. La ong ruh ba ki draibar jong kitei baroh ar tylli ki kai ki la shah kem noh namar kim lah satia ban ai ka jubab kaba shai lane ki kot ki sla kiba biang ban pynshisha ïa ki mar ba ki kit.
Kumta ïa kitei ki briew ba shah kem ryngkat bad ki tiar ba ïoh kurup la aiti noh sha ki pulit ban leh ïa kaba donkam katkum ki kyndon jong ka ain.
Ha kawei pat ka jingkhynra, la ïathuh ba hadien ba la ïoh ïa ki jingtip kiba bniah, ka kynhun na ka 43rd Battalion jong ki BSF Meghalaya, ryngkat ka jingtreilang bad ki pulit Meghalaya ki la ïoh ban kurup haduh 9000 kilo u kwai tyrkhong kiba shongdor haduh 18lak tyngka.
Ka kyrwoh ka ong ruh ba ïa kitei ki kwai la lap na kawei ka iing ba shu ieh iing jah hajan Rongra, ka thain kaba don ha khappud jong ka South Garo Hills.
