Haduh 844 klur mang ka sorkar ban kyntiew ïa ka kam Ïalehkai ha ka jylla

Shillong, Rymphang 23 : U Myntri Rangbah ka Jylla Conrad K Sangma haba wanrah ïa ka Mangtyngka na bynta u snem 2026-27 u la pyntip ba la mang haduh 840 klur tyngka na ka bynta ka tnad Sports and Youth Affairs na ka bynta ban kyntiew ïa ki kam ïalehkai ha ka jylla.
“Da kaba buh hakhmat na ka bynta ki jingtei, ka jingpynlut na ka bynta ki nongïalehkai bad khamtam ban pynlong ïa ka National Games, Nga tyrwa ïa ka jingmang tyngka kaba 840 klur tyngka na bynta ka Department of Sports and Youth Affairs ha u 2026-27 kaba la kiew haduh 104 persen mynta u snem,” ong u Myntri Rangbah haba wanrah ïa kane ka Mangtyngka ha ka janmiet sngi Nyngkong ha Iing Dorbar Thawain ka jylla.
Shwa kane, u Myntri Rangbah u la ong ba kane ka snem Mangtyngka kadei kaba kongsan bha ha ka history jong ka tnad ïalehkai ha ka jylla. “Ka Jylla jongngi ka la shah jied ban pynlong ïa ka National Games kaba 39 ha u snem 2027. Kumta kane kadei ka burom kaba khraw, ka jingkitkhlieh bad ruh ka jingithuh ïa ka Meghalaya,” u laong.
U la ong ruh ba ha kane ka lympung bah kin don haduh palat 10,000ngut ki nongïalehkai naduh ki nongïalehkai ban aireng ha ka Olympik, ki nongkhur takma ha ka Asian Games kiban wan iuhkjat ha ka sien kaba nyngkong eh ha ka jylla. “Kin don haduh kumba 8,000 ngut ei ei ki nongshong shnong ka jylla bad kumjuh ki samla kiban ïoh ïa ka lad ban long ki nongïarap bad kiban snohkti lang ha ka jingpynlong ïa kane ka National Games.”
Ha kajuh ka por u Myntri Rangbah u la ong ruh ba ka National Games mynta ka kynti kan dei kaban pynsahnam namar ka Meghalaya kan ïoh ban pynlong kham bun tylli ki jait jingïalehkai nalor ba kiwei ki jylla ruh ki ïoh lang ïa ka lad ban pynlong lang ïa kane ka lympung ïalehkai kaba heh tam ha ka Ri.
“Ha kane ka por, ka ïoh ka kot jong ki nongshong shnong, ki kam jngohkai pyrthei, ka leit ka wan ki kali, ki nongkhaii ba dang khie bad bun kiwei kiwei kin sakhi ai ka jingkylla kaba jur bha namar kin don la kumno kumno haduh kumba 30,000 ngut ei ei kiban ïoh kamai bad ïoh kam (indirect employment) ha kylleng ki bynta jong ka jylla da ka jingwan jong kane ka Games. Nga la tyrwa ïa ka mangtyngka kaba 210 klur na bynta ban pynlong ïa ka National Games,” u la bynrap shuh shuh.
Nangta u la ong ruh ba ki don bun ki projek kiba heh kynthup ïa ka JN Sports Complex ha Shillong bad ka PA Sangma Sports Complex ha Tura kiban sa pyndep noh ha ka snem mangtyngka ban wan. “Ngi la tei ruh ïa ka Mawkhanu Football Stadium kaba dei ka football stadium kaba heh tam ha India kaban ngiam haduh 40,000 ngut ki nongpeit kai. Ha Umtham, Ri Bhoi district pat ngi la tei ïa ka International Standard Slalom Course kaba dei kaba nyngkong eh ha India, ka sienjam ban kyntiew ïa kane ka jingïalehkai ha ka Ri.”
Shuh shuh u ong ruh ba mynta ki la tei ruh ïa ka International level Aquatics bad Tennis Complex Umsawli, bad kumjuh ïa ka Youth Hostels la tei ha Shillong bad Tura. “Kumta nga tyrwa ïa ka mang tyngka kaba 400 klur tyngka na ka bynta ka jingtei ïa ki jaka ïalehkai”, u la ong shuh shuh ha ka Mangtyngka
U Myntri Rangbah u la ong ruh ba mynta ka jylla ka la pynkhreh ïa ki nongïalehkai ba kin lah ban paw ha kane ka lympung.
“La dep ban ai ka jingkyrshan sha baroh ki Synjuk ïalehkai ba kin thung ïa ki coach bad thied ïa ki tiar ïalehkai kiba paka. Ban pynshlur ïa ki nongïalehkai, ngi la mynjur ruh ïa ka ‘Meghalaya Outstanding Sportspersons Direct Appointment Policy, 2025’ bad ruh ïa ka Service Rules khnang ba kiba khur takma kin ïoh kam sorkar.”