Tura, Naitung 04 : Ka District sessions court Williamnagar, East Garo Hills, ka la rai pynshitom da kaba set phatok haduh hynñiew snem ïa uwei u rangbah ba shah kynnoh leh beijot ïa ka thei samla ryngkat ka kuna kaba 1,500 tyngka.
Ka Ïing Bishar ka la pynngat ruh sa shisnem ka jingset phatok khlem pynjynjar ryngkat ka kuna kaba 500 pyrshah ïa utei u ba shah kynnoh katkum ka kyndon 354 jong ka Indian Penal Code.
Katkum ka khubor, ki pulit ka Williamnagar ki la ïoh pdiang ïa ka ejahar pyrshah ïa uwei u Md Rafiqul Ali halor ka jingleh khlem akor ïa kawei ka kynthei ha ka 23tarik Rymphang 2017. Hadien ba la kem ïa utei uba shah kynnoh bad set phatok ka jingtohkit ka la ïaid hapoh ka jingpeit jong ka ophisar pulit Nitu I Sangma kaba dei ruh ka officer incharge jong ka Williamnagar Women police station.
La ong ka jingpynngat kyndon ïa utei u rangbah la shim da ka Ïing Bishar ha kane ka taiew ba la dep.
