Haduh 65-70% la ïaid ka jingpyntrei ïaka madan Artificial Turf ha Umbuda, sngewhun u MLA, pynthikna ban plie noh shen

Nongpoh, Naitung 22 : Ban pynthikna ïaka jingïaid beit ïaid ryntih jong ka kam bad ban pyndep haka por kaba biang u MLA ka Nongpoh u Bah Mayral Born Syiem mynta ka sngi u la leit ban jurip ïaka madan Artificial Turf kaba dang ïaid shaid shaid ka jingpyntrei haka shnong Umbuda ha Ri-Bhoi District kaba dei ruh kawei naki madan ba ki khun samla kila ap khmih lynti ban ïoh plie noh ïaka.
Ha katei ka jingleit jurip u MLA la sakhi ruh da ka jingdonlang ki nongïalam shnong ka Umbuda bad Mawroh ryngkat ki Sports Club, ha kaba naka liang u MLA u la pynpaw ka jingsngewhun ha kaba ïadei bad ka jingpyntrei ïa katei ka madan namar ka kam mynta ka ïaid shaid shaid bad u kontraktor ba pyntrei ïa katei ka kam u khlem shongthaid kumba la bthah ïa u ban pyndep haka por kaba biang bad kumba long haduh mynta ka kam kala ïaid kumba 65-70% bad khmih lynti ruh ba yn sa lah ban pyndep kloi ïaka haka por ba biang bad ka por bala buh.
Kum ban shu pynpaw ba ïa katei ka madan la wan ban buh maw nongrim da u Myntri Rangbah ka jylla ha u bnai Lber 2024 ryngkat ka jingmang pisa kumba 10.93 klur lyngba ka tnad ïalehkai ka jylla.
Haba kren sha ki lad pathai khubor hadien ka jingjurip naka liang u Bah Mayral Born Syiem u la pynpaw ka jingsngewhun ïaka rukom pyntrei ïa katei ka madan namar bun ki kam kila ïaid shaid shaid khlem shongthaid bad khmih lynti ruh ïa katei ka madan yn sa lah ban pyndep bad plie noh shen naka bynta ka jingmyntoi ki khun samla ka dong bad ka thaiñ wat hapdeng shibun ki jingeh.
Naka liang u Bah CB Syiem Rangbah Shnong ka Umbuda u la pynpaw ba kum ka Drobar Shnong kaba la ai sngewbha ruh ïa katei ka jaka ka jingsngewnguh bad ai ka jingkhublei halor ka jingshimkhia jong u MLA ban jurip ïa katei ka madan kum ka jingbuddien ïaka jingïaid beit ïaid ryntih jong ka kam ban pynthikna ba ki kam ki ïaid shaid shaid bad ban pyndep haka por ba biang.
U la buh ruh ka jingkyrpad sha ka sorkar jylla kumba ka shnong kala ai ssngewbha ïaka jaka, ka dei ruh ban shimkhia ban pynitynnad naduh u surok, ki lynti syngkien, ban pynïoh ruh ïaka jaka shong ki paidbah kiba wan peitkai haba don kano kano ka jingïalehkai bad kumjuh ruh ki bor jingshai ne Floodlight ha ki sawdong jong katei ka madan ba ki khun samla kin ïoh ban lehkai ym tang haka por mynsngi hynrei wat haka por miet kumjuh.