Haduh 6 ngut rah ki Pulit halor ka jingbuh bomb ha phyllaw ïing u MLA barim, pyntip u DyCM

Shillong, Risaw 18 : Ki la don haduh hynriew ngut ki briew kiba la shah rah ha ki pulit na ka bynta ban tohkit bniah halor ka jinglap ïa u bom uba leit ban buh ha phyllaw iing jong u Bah Nehlang Lyngdoh ha Umsning ha ka taiew ba la dep, la pyntip u Symbud Myntri Rangbah ka Jylla ba peit ruh ïa ka tnad Kampohiing, Bah Prestone Tynsong.
“Ki pulit ki la rah kumba 6 ngut ei ei ki briew bad kin dang don shuh katba ka jingtohkit ka dang ïaid,” ong u Symbud Myntri Rangbah haba kren bad ki lad pathai khubor.
Nangta u ong ruh kumba ka seng kieng atiar ka la kam ba ka leh ïa kane ka jingjia kumta u ong ba na ka liang ki pulit ruh kin pynjur ka jingtohkit bad ban pyntikna ruh ba ka shongsuk shongshngain kan synshar ha ka jylla baroh kawei.
“Ngin ym ailad ba kum kine kiei kiei kin ïoh ban jia ha ka jylla jongngi,” bynrap biang u Bah Prestone.
Da kaba kyntait ban ïathuh bniah shuh shuh halor kane ka kam, u Symbud Myntri Rangbah u la ong ba kum ka jylla ki shaniah ha ka tnad pulit ban pynlong ka jingtohkit kaba bniah bad pura bad hadien kata pat kin sa ai ka jingtip paidbah kumba ka long.
Ha kajuh ka por u Bah Prestone u la ong ruh ba katei ka seng kieng atiar ka dei ruh ban kdew kaei kata kaba ki politishan ki ïa pein na ka bynta ka jaidbynriew. “Phi ong ïangi kaei ka kam kaba ngi leh. Lada kren hok ïa ka jingshisha dei mangi ki politishan bad dei kine ki nongmihkhmat kiba bunsien ki paidbah ha la ki jong ki jong ki constituency ki shaniah met bad mynsiem haba don ki jingeh bad ki jingjia ha ka longbriew manbriew da kaba leit ha ki nongmihkhmat jong ki,” u la ong.
Nangta u ong ruh ba baroh 60 ngut ki MLA ki don la ka jong ka jong ka jingkitkhlieh na ka bynta ka khia ka shong bad ka bit ka biang jong ki paidbah ka constituency jong ki.