Shillong, Naiwieng 25 : Ka kynhun ïalehkai jong ka Shillong Lajong FC ka la lah ban pynliem haduh shiteng dorjon, kata haduh 6-0 kol pyrshah ïa ka Mawkriah West ha ka lympung ïalehkai jong ka SSA Champions Cup kaba long ha kane ka sngi Ba-ar ha madan SSA, First Ground, Polo.
Ha kawei pat ka jingïakhun, ka Nongkseh SS&CC kaba dei ka lahduh ha ka First Division mynta u snem ka la ïoh ban pynliem da ka said ïa ka Laitkyrhong kata da 1-0 kol.
Ha ka jingïakhun kaba nyngkong, ïa ka kol jop na bynta ka Nongkseh la ïoh ban thep da u Hardy Cliff Nongbri ha ka minit kaba 90 kata ha shwa ba ka por ïalehkai kan poi artad sha kaba kut.
Ka jingïoh jong ka Nongkseh ïa kane ka kol kaba wan beit beit na kaba shut corner ka la pynkyndit lut ïa ki rangap dien jong ka Laitkyrhong.
Mar ïa khih ka jar, ki nongïalehkai ka Nongkseh ki la kmen lut bad kane ka la pynlong wat ïa ki nongkyrshan ruh ban shad da ka jingshongshit khamtam haba ki ïoh ban mad ïa ka jingjop tad haduh ka minit kaba 90 jong ka kylla miet.
Kane ka kynhun kaba la jop beit lynter khlem shah rem shisien ruh naduh kaba sdang jong ka lympung bad tad haduh ban da kut syndon ka samoi ïalehkai First Division, ka la bteng biang da ka jingkyrmen ha ka jingïakhun sdang jong ka Champions Cup.
Haba phai pat sha ka jingïakhun kaba ar jong ka sngi, tang u Riborlang L Lyngkhoi marwei u la ïoh ban thep haduh lai kol, kata ha ka minit kaba 25, 28 bad 39′, kata ruh tang ha ka kylla step. Katba ïa kiwei pat ki kol la ïoh ban thep da u Ricky Kharkongor ha ka minit kaba 74, Willbeson Jaba ha ka minit kaba 88 bad u Samchaphrang Lato ha ka minit kaba 90 kaba pynlong artad ïa ka Shillong Lajong ban khur suk ïa ka jingjop.
Lah ban kdew hangne ba ka Shillong Lajong FC kadei ka lahduh ha ka Super Cup katba ka Mawkriah West pat ka dei ka lahduh jong ka Third Division mynta u snem.
Ka jingïakhun ha kane ka sngi Balang ruh kan dei kaba itynnad bha namar ha ka Group A, ka Umlyngka kan hap ban ïakhun pyrshah ïa ka MLP FT ha ka por 1:00 baje mynsngi.
Katba ha ka por 4:30 baje janmiet pat ka Mylliem Lum kan ïakhun pyrshah ïa ka Langsning FC.
