Haduh 50-60% ot kiba sam tiar bad vendor na ka pisa ba pyntrei ïa ka skhim NREGA, kynnoh u MDC Tura

Shillong, Naitung 07: U MDC ka BJP na Tura u Bernard N Marak u la byrngem ban ujor da ka FIR pyrshah ïa ki supplier ne nongsam tiar ka NREGA bad ki vendor da kaba kynnoh ba ki ot 50% -60% na ka pisa kaba la thmu ban sam ïa ki tiar pyntrei ïa katei ka skhim.
Ha ka kyrwoh kaba u la phah, u Marak u la ong, “Ki NREGA supplier bad ki vendor ki la ot haduh 50% na ka pisa kaba la mut ban sam ïa ki tiar na ka bynta ki jingtrei hapoh ki shnong ki thaw. Kane ka la jia bha hapoh ki C&RD Block ha Garo Hills.”
“Katto katne na kine ki supplier ki la ong ba ki hap ban ot ïa ka pisa naba ki hap ban siew ïa ki nongïalam jong ki riew seng saiñ pyrthei bad katto katne ki ophisar na ka pisa kaba la mang. Kane kadei ka daw ba bun na ki shnong kim lah ban pyndep pura ïa ki kam ha ka por ba la buh,” u la kynnoh.
Haba kyntu ïa ki nongshong shnong ban pynpaw ïa kane ka jingjia, u Marak u la ong, “Nga kyrpad ïa ki nongshong shnong kiba la shah ot 50 haduh 60% ka pisa na ki supplier bad vendor ban ïathuh mardor ha ka ophis jong nga bad ngin ujor da ka FIR pyrshah ïa kito kiba ïuhroit ïa ka hok ki nongshong shnong. Ngin pyntip sha ophis u CM bad ki Deputy Commissioner shaphang kane ka kam bamsap.”