Shillong, Jylliew 13: Ka ophis Sub Divisional Officer, Pynursla Civil Sub Division ka la pynbna paidbah kum ka jingpyntip kyllum ïa baroh ki nongleit nongwan bad ki paidbah ba ynsa khang biang shipor ïa ka surok hapdeng ka Laitlyngkot bad Lyngkyrdem (chainage kms 24+00-37+00) ïa baroh ki kali ba leit ba wan manla ka sngi naduh ka 16 tarik u Jylliew haduh ka 20 tarik u Jylliew mynta u snem kaba long naduh ka por 8 baje mynstep haduh ka 11 baje mynstep bad naduh ka por 1 baje nohphai sngi haduh ka por 4 baje janmied.
La kyrpad ïa baroh ki nongïaid nongïeng ba kin khreh lypa ha ka por kaba biang ïa ki jingleit jingwan jong ki ha kitei ki sngi bad ki por ba la buh na ka bynta ka jingmyntoi lang jong uba bun balang bad ka jinglah ban pyndep biang por ïa ka jingshna ïa ka surok, ong ka kyrwoh khubor na SDO (C) Pynursla Civil Sub Division.
