Haduh 5 sngi bishar kam ka kynhun NLM ïa ki jingtrei ka Animal Husbandry & Veterinary Meghalaya
Shillong, Rymphang 14: Ka tnat Animal Husbandry & Veterinary, ka sorkar Meghalaya ka la pynlong ïa ka jingïalang batai lyngkot ïa ki kam ki jam bad ki jingtrei jong ka tnat ïa ka kynhun jong ka National Level Monitoring (NLM) Team kaba wan na ka sorkar pdeng ban bishar ïa ki kam haduh 2 sngi, New Delhi, hapoh ka ophis jong Director, Animal Husbandry & Veterinary Department.
Ïa ka jingïalang la pynïaid da ka Dr. (Ms.) A. Chyne, Director, Animal Husbandry & Veterinary Department, ha ka jingdonlang Dr. M.D. Sharma, (ISS) Deputy Director & Nodal Officer for Central Sector Scheme, ha ryngkat ki heh ophisar ka tnat bad ki nongmihkhmat na ki shnat ba pyntrei ïa ki kam.
Na ka liang ka National Level Monitoring Team, kiba ïadonlang ki kynthup ïa Dr. Mihir Mondal (NLM, DAHD) bad Dr. Mahesh Katara National Level Monitoring ba la pynbeit da ka DAHD ban wan jngoh ïa ka jylla ban bishar bad shim jingkheiñ halor ki jingïaid beit ïaid ryntih jong ki skhim ba la bei tyngka da ka sorkar pdeng ba la pyntreikam da ka tnat.
Ki 4 tylli ki skhim kiba don kiba la bishar kam ki long ka Rashtriya Gokul Mission (RGM), National Livestock Mission (NLM), Livestock Health & Disease Control Programme (LHDCP), National Programme for Dairy Development (NPDD), bad kiwei ki kam kyntiew ïa ki jingri kiba la sdang ha ki sngi ba ki wan jngoh jong ki kaba la long ha ka 12 tarik haduh ka 16 tarik mynta u bnai 2026.
Ka kynhun NLM kan leit jngoh ruh ïa ki jaka bapher bapher ha East Khasi Hills, West Khasi Hills, bad West Garo Hills district ban jurip ïa ki project site, ïasyllok bad kiba ïoh jingmyntoi, bad ban shim jingkheiñ halor ki jingbha bad jingdonkam jong kine ki skhim.
Kane ka jingwan jngoh ka thmu ruh ban pyntyllun ïa ki kam, ban pynthikna ïa ki jingkhuid ki jingtreikam bad ki jingkheiñ kiba biang bad kumjuh ruh ban pynïoh ïa ki jingai jingmut kiba tei na ka bynta ka jingpynbha ban kyntiew ïa ki kam jingri kiba long katkum ki prokram bapher bapher hapoh jylla Meghalaya.