Jowai, Naitung 25: Ki nongshong shnong jong ka thaiñ Block-I ba kynthup ïa ka shnong Deiñler kila pynpaw ba haba ki kit ïa ki mar ki mata la jong ruh kila shah daiñ kuna ha ki briew jong ka Karbi bad kane ka jingshah daiñ kuna ka kham heh dor haba ki wan kit ïa u Synsar na ki jaka rep jong ki.
Katkum ka jingïathuh jong kitei ki nongshong shnong ki ong ba haba ki wan kit ïa u Synsar ki hap ban siew ka kuna kaba T.3000/- haduh T.5000/- tyngka, tang ban ïoh pynpoi sha la ïing ïa une u mar rep jong ki. Nalor ba ki hap ban siew kuna ïa kiwei de ki jait mar rep jong ki. Ïa kane ka jingeh ki nongshong shnong kila pynpaw ha khmat ki nongïalam jong ka Hynñiewtrep National Youth Movement (HNYM) ha ka jingleit ïa kynduh jong ka seng ïa ki nongshong shnong ka shnong Deiñler bad kiwei de ki shnong ba marjan ha ki jaka khappud.
Ki dkhot jong ka Hynñiewtrep National Youth Movement (HNYM), naduh ka Central Body, kiba kynthup ïa u President Sengkmie bah Loris Dohtdong, Vice President P. Nongphlang, General Secretary K. Rangjem, ma Coming Soon Dkhar President East JH bad kiwei de, ha ka sngi Saitjaiñ ki la hiar sha ka shnong Deiñler ka shnong kaba hap hapoh ka thaiñ Block-I jong ka Elaka Labang Nongphyllut hynnin ka sngi ban sngap ïa ka jingeh kaba ki nongshong shnong kane ka thaiñ ki ïakynduh.
Katkum ka jingpynpaw jong ki nongshong shnong ki ong ba hapoh kane ka thaiñ ki don haduh 36 tylli ki shnong kiba mat ïa ki jingeh ba khraw ha kiba bun ki liang, nalor ka jingeh ha ka liang jong u pud u sam hapdeng ka jylla Meghalaya bad ka jylla Assam.
Ki nongshnong jong kane ka shnong Deiñler bad kiwei de ki Waheh Shnong ba marjan kiba donlang ha kane ka jingïakynduh bad ka seng HNYM, ki la pynpaw lut ïa baroh ki jingeh ba ki ïakynduh na ka por sha ka por, naduh ki lynti syngkieng, ki umbam umdih, ki jaka sumar, ki jaka pule nalor bun kiwei pat kiba ïadei bad ka kam rep kam riang jong ki. Kila pynpaw ba wat la ki shong ha la ka jong ka ri, hynrei ki sngew kumba ki don sha kawei pat ka ri namar ka jingshah leh donbor ha ki Karbi ba don ha kane ka thaiñ.
Ha ka jingïadei bad ka synshar shnong synshar thaw kane ka thaiñ kam pat don ïa u Doloi ba pura naduh u snem 1972 bad kumba long mynta ki don tang u Acting Doloi bad kane ka buh jingeh ba khraw ïa ki nongshong shnong. Kila pynpaw ba kila ju leit ïa kynduh bunsien ïa u CEM ka JHADC na ka por sha ka por hynrei ka JHADC kam pat lah satia ban pynïoh ïa u Doloi ba pura ïa ki.
Na ka liang ki nongïalam jong ka seng haba ki ïoh sngew ïa kine ki jingeh ba khraw jong kine ki briew jong ka thaiñ ki la dap ka jingsngewsih kaba khraw ban tip ïa ka jingshah lehbeiñ jong ki paradoh parasnam, kumta na kaliang jong ka seng ka la kular ban ai ka jingïarap ïa ki, hynrei la kyntu jur ïa ki nongshong shnong ba ki dei ban ïatreilang bad ka seng khnang ban lah ban ïaleh pyrshah ïa kine ki jingeh.
Ïa ka jingïalang la pynïaid da u bah Comingson Dkhar uba dei u Chairman ka Labang Nongphyllut Area Committee. Ha kane ka juh ka sngi na ka liang jong u President Sengkmie ba Loris Dohtdong ula ïoh ruh ban pynhap pyrda ïa ka jingïalehkai Football Final kaba la long hapdeng ka Moojem FC bad ka Lamarang FC. Ha ka jingïalehkai ka Moojem kala jop ïa ka Lamarang da 1-0 kol.
