Haduh 5-0 kol pynliem ka Langsning ïa ka Nangkiew Irat ha ka Shillong Premier League

Shillong, Risaw 07 : Ka kynhun ïalehkai jong ka Langsning ka la lah ban pynliem noh ia ka Nangkiew Irat haduh 5-0 kol ha ka jingïakhun jong ka Shillong Premier League 2025 kaba long ha ka janmiet sngi Ba-ar ha madan SSA, First Ground, Polo.
Ia ki kol jong ka Langsning ha kane ka sngi la ïoh ban thep ar tylli da u Wanshwadame Diengdoh ha ka minit kaba 40 bad 52, nangta u Manbhalang Nongmin ha ka minit kaba 84 bad u Donlad Diengdoh ar tylli ha ka minit kaba 90 bad ka minit kaba 90+1.
Ka jingjop jong ka Langsning ha kane ka sngi ka la pynduh mynsiem ïa ka Nangkiew Irat ban ïoh rah ia ka nam lahduh ha kane ka lympung mynta u snem.
Da kane ka jingjop, ka Langsning mynta ka la kiew sha ka kyrdan kaba lai jong ka miej khein point da ki 14 point ban knieh noh ïa ka kyrdan jong ka Nangkiew Irat kaba don mynta ha kyrdan kaba saw da ki 13 point ha ka miej.
Ka Nangkiew Irat ka la buh ïa ka thong ban khur ia ka jingjop ha kane ka sngi namar lada ka lah ban leh kumta kan ïoh ban lamkhmat ha ka miej khein point namar ka Shillong Lajong bad ka Mawlai, ki don mynta 15 point ha ka kyrdan ba shajrong jong ka miej khein point.
Haba phai sha ka jingiakhun, ka Nangkiew Irat ruh ka la ïoh katto katne ki kabu ksïar tangba ki rangthep kol jong ka kim shym la lah satia ban leh ei ei.
Ka jingïakhun mynta ka sngi Balang pat kan long hapdeng ka Mylliem kaba don ha kyrdan kaba 9 pyrshah ïa ka Nongrim Hills kaba don ha ka kyrdan kaba 10 ha ka por 4:30 baje janmiet.