Shillong, K’ Lyngkot 30: Ka eksam Secondary School Leaving Certificate, kaba la tip kum ka eksam matrik kaba la pynïaid da ka Meghalaya Board of School Education mynta u snem 2026 ka la sdang ha ka sngi Thohdieng.
Na ka liang ka tnat ka la pyntip ba baroh ki khynnah kiba thoh ïa kane ka eksam mynta u snem ki don 48793 ngut, bad ki jaka thoh eksam baroh ki long 171 tylli, ha Shillong Region ki don 97 tylli bad ha Garo Region ki don 74 tylli kane ka jingkheiñ ka long katkum kaba la phah na Meghalaya Board of School Education da u bah M Marbaniang Director Shillong Region.
La ong ba ki skul kiba don ha ka jylla kiba pynïasoh bad ka Meghalaya Board Of School education ki don 1935 tylli, ka por thoh eksam ka long 10.00 baje mynstep, ïa ki khynnah ba kin rung ha ki jaka thoh eksam la shah naduh ka por 9.00 baje mynstep bad ha ki kamra thoh eksam la shah ba kin rung ha ka por 9.30 shiteng mynstep.
La ïohi ba ha kane ka sngi sdang ki la don bun bha ki kmie ki kpa kiba la leit ban synran ïa la ki jong ki khun ki kti sha ki jaka thoh eksam bad ki khynnah ruh, wat shwa ban rung ha ki jaka thoh eksam, ki dang ïaleh ban pule ne revise ïa ka subject ka kin thoh mynta ka sngi kaba dei ka English subjek, bad kane ka eksam matrik kan kut ha ka 11 tarik u Rymphang, 2026.
