Haduh 4 la 0 kol pynbam ka India ïa ka Hongkong mar ïa ïoh rung biang sha ka lympung Asian Cup

Kolkata: U khlur ïalehkai jong ka India ha ka World Cup Under 17, kaba la long ha India ha u snem 2017 bad uba saw ki Doktor ki la bthah ïa u ba un iehnoh noh ïa ka jingïalehkai Phutbol namar ka jingpang klong snam, hynrei ha ka sngi Balang, u la long u khlur ban ïarap ïa ka India ban rung sha ka Asian Cup Championship ha ka rukom kaba itynnad, da kaba pylliem ïa ka Hong Kong da 4 kol la 0.
Une udei u Anwar Ali, uba defender ba dang 21 snem jong ka India, uba la ïoh thep ïa ka kol ba nyngkong jong ka India pyrshah ïa ka Hongkong, ha ka jingïalehkai hapdeng u lapbah lapsan ha nongbah Kolkata.
U Ali, u la ïoh thep ïa ka kol ha ka minit kaba ar, ha ka por ba ki paidbah nongkyrshan kiba la pyndap smam ia ka Salt Lake Stadium ryngkat ka jingpyrta “India…India”.
U Ali u la ïoh thep ïa ka kol kaba itynnad lyngba ka corner ba la shut da u Ashique Kuruniyan.
Ka India kaba la ïoh rung lypa sha ka Asian Cup ha u snem 2023, kaba long ka sien kaba nyngkong ba kan ïoh rung sha kane ka Tournament arsien lynter, hadien ba ka la ïoh rung ha u snem 2019. Shuwa ba ka India kan ïakhun ïa ka Hong Kong ha ka Sngi Balang, ka India ka la ïoh rung lypa hadien ka jingjop ka Palestines ïa ka Phillippines. Ki team kiba poi ha ka kyrdan ba nyngkong na ki Group kin ïoh rung beit sha ka Asian Cup. Hynrei yn jied ruh san tylli napdeng ki team kiba ïalehkai bha kiba wan ba ar na ki Group.
Ka India shuwa jong ka jingïakhun bad ka Hong Kong, kadei kawei na kine ki team. Hynrei u Sunil Chettri bad ki nongïalehkai ka India kim shym la hun ban shu rung tang kum ka team ba wan ba ar na ka Group, pynban ki la ïalehkai bha ban rung kum ka top team.
Ha ka jingïalehkai ba khatduh jong ka jingïaknieh rung sha ka Asian Cup, ka kol ba iynnad bha ba la thep da u Captain jong ka India, kata u Chettri ha ka minit ba 45 jong ka jingïalehkai, ka la lah pynlah ïa ka India ban tam da 2 la 0 ha kaba kut jong ka kylla step.
Hadien ka kylla step, ha ka jingïakhun na ka bynta ka kylla miet, ki nongïalehkai kim shym la hun ban thep tang 2 kol, hynrei ki la ïakhun tyngeh ban ïoh thep kol biang bad dei ha ka minit kaba 85 ba u Manvir Singh, uba mih pli ha jaka uwei pat u nongïalehkai bad u Manvir Singh bad u Ishan Pandita, u ruh uba mih pli ha jaka uwei pat u nongïalehkai u la ïoh thep ha ka minit kaba 93 jong ka jingïalehkai ban pynjop ïa ka India da 4 la 0.
Kane kadei ka sien kaba nyngkong eh ïa ka India ba kan jop ïa ka Hong Kong hadien 69 snem.