Haduh 39.17 klur tyngka pyllait ka sorkar ban sam sha ki 26 tylli ki synjuk ïalehkai ban pynkhreh na bynta ka National Games

Shillong, Jylliew 23 : Kum ka jingpynkhreh na ka bynta ka 39th National Games kaban long ha u snem 2027, ka sorkar jylla hynne ka sngi ka la pynlong ïa ka prokram ba kyrpang na kaba bynta ban sam ïa ki song jingkyrshan sha ki kynhun bapher bapher ha ka jingïalang kaba long ha State Convention Centre, Shillong.
Kane ka sienjam ka long ruh kum shi bynta ka jingpyrshang da ka tnad Sports and Youth Affairs na ka bynta ban kyntiew lane ban pynbha shuh shuh ïa ki kam ïalehkai lyngba ki skim ba kyrpang kaban peit kyrpang na ka bynta ka jingpyntbit ïa ki nongïalehkai.
Da kaba pynpaw ïa ka jingthrang jong ka sorkar ban pynkylla dur ïa ki kam ïalehkai ha ka jylla, u Myntri Rangbah ka jylla, Conrad K Sangma u la ong ba u sngewkmen ban ïohi ba ki kam ïalehkai ki la sdang ban paw bad kiew stet ha ka jylla.
“Ngi la ïohi ïa ka jingkiew arted ha ki kam ïalehkai bad kane ka urlong lyngba ki synjuk ki kam ïalehkai, ki nongïalam seng sain pyrthei lane ki nongïalehkai hi, baroh hi ki noh synniang lang. Nga ïohi ruh ïa ka jingkylla kaba stet bha ha ka liang ki kam ïalehkai ha ka jylla jongngi,” bynrap u Myntri Rangbah.
Ha kane ka sngi u la pynpna ruh ba kan don ka jingkylla kaba khraw ruh ha ka liang ki jaka ïalehkai ha kaba la mang haduh 1900 klur tyngka kaban kynthup ïa ka jingshna ïa kumba 50 tylli ki madan artificial turf ha baroh kawei ka jylla kaba long ruh ka sien kaba nyngkong ha ka jylla bad ruh ka jingshna pynbha ïa ki madan mareh lane ki synthetic track kaba heh tam ha ka thain shatei lam mihngi jong ka ri. “Kine baroh ki dei ki kam kiba la pynlut na ka bynta ka jingdonkam jong ki khun samla ha ka lawei ban wan.”
Haba kren pat halor ka jingpynkhreh jong ka jylla ban pynlong ïa ka National Games, u Myntri Rangbah u la ong ba kane kadei ka sien kaban sah jingkynmaw shirta ba ha ka sien kaba nyngkong ka jylla kan ïoh ban pynlong ïa ka lympung ïalehkai kaba heh tam ha ka ri. kumta u la ong ba ka long kaba donkam ban aiti lut met bad mynsiem ban pyntikna ba kane ka lympung ïalehkai kan ïoh ban thaw histori ha ka jylla.
U Myntri Rangbangbah u la ong ruh ba kin treilang ryngkat ryngkat bad ka Tourism Department na ka bynta ban kyntiew ïa ki homestary bad ruh ki hotel na ka bynta ki nongïalehkai kiba wan na kiwei ki jylla bad kane hi kan plie lad na ka bynta ban ai kam ai jam ïa ki nongshong shnong ka jylla nalor ba kan kyntiew ruh ïa ki kam jngohkai pyrthei.
“Lyngba kane ka prokram ka thong ka long ban kyntiew ïa ki nongïalehkai bad ki synjuk ïalehkai,” ong u Myntri Rangbah.
Da kaba kam ba ka Meghalaya kan ïoh ban pynlong ïa ka National Games ha ka sien kaba nyngkong, u Myntri Rangbah u la ong ruh ba u kyntu ïa ki paidbah ba kin buh thong ban khur haduh 50 tylli ki takma ha kane ka National Games.
Kum shi bynta jong ka Team Meghalaya, la mang haduh 39,17,64,000 tyngka sha ki 26 tylli ki synjuk ïalehkai jong ka jylla bad ruh sha ka Meghalaya State Olympic Association ban kyrshan ïa ki na bynta ki jingkilan met bad kiwei kiwei ki jingpynkhreh.
“Kane kadei ka sien kaba nyngkong ha ka history jong ka Ri ba ka jylla ka ai ïa ki jingkyrshan pisa sha ka Shillong Sports Association.” La kdew ruh ba ka sorkar jylla naduh u snem 2018 ka la ai ka jingkyrshan pisa hdauh kumba 15 klur tyngka sha ka SSA.
Shuh shuh u ong ruh ba ki kwah ban pynlong ïa kane ka National Games, ka lympung ïalehkai kaban pynneh ïa ka mariang bad ki sawdong sawkun da kaba wallam bad pyndonkam da ki pla rah bad ki bilor um kiban ym ktah ïa kiba yn shna da ka jingïatrei lang bad ki nongtrei kam lajong na ka jylla.
Haba bynrap lang, u Myntri ka tnad ïalehkai, Bah Shakliar Warjri u la ong, ba ka sorkar ka ieng ha ka nongrim ban wanrah ïa ki jaka ïalehkai kiba kynsai bad kyrshan ruh ïa ki nongïalehkai. “Ngi shaniah ha ki synjuk ïalehkai jong ka jylla bad lyngba kane ka sienjam ngi kyrmen skhem ba ngin lah ban poi sha ka thong. Ka thong jongngi hi ka long ban ïohi ba ki samla ïalehkai jongngi kin lah ban khur ym tang ïa ki takma ksiar ha ki state level hynrei ruh ha ki national level bad ruh ha ki international level,” u la ong.
Katba na ka liang u Chief Secretary ka Jylla, Bah DP Wahlang u la ong ba kane kadei ka aiom ksiar na bynta baroh ki synjuk ïalehkai. “Nga kwah ba kane ka National Games 2027 kan long kaba jop bad kata kan urlong tang lada ngi ai ka jingïatreilang ryngkat ryngkat bad ngin lah ruh ban wanrah burom ïa ka jylla.”
Ha kawei pat ka liang u Dr. Vijay Kumar ba dei u Commissioner & Secretary ka tnad Sports u la pynkynmaw ba ka jingïoh jong ka jylla ban pynlong ïa kane ka lympung kadei hadien ka jingpynhap pyrda ïa ka lympung ïalehkai National Games kaba dang shu lah shen ha Uttarakhand. “Kadei ka sngi kaba khraw tam na ka bynta jongngi baroh haba ka Meghalaya ka la shah jied ban pynlong ïa kane ka lympung ïalehkai. Bun ki jylla ki thrang dik dik ban ïoh ïa kane ka burom ban pynlong ïa ka National Games nynrei dei lyngba ka jingtrei borbah jong u Myntri Rangbah bad Myntri ka tnad Ïalehkai bad kine baroh ki la urlong.”
U la pyntip ruh ba kane ka lympung ïalehkai ka dei kaba kongsan bha kaba donkam ïa ki lai tylli ki bynta, kata ki jaka ïalehkai, ka jingpynkhreh jong ki kynhun ïalehkai ka jylla bad kawei pat ka jingpynkup bor ïa ki synjuk ïalehkai.
Shuh shuh u la pyntip ruh ba ka sorkar jylla ka la pynlut bun bha ha ki jaka ïalehkai bad ha kajuh ka por ki synjuk ïalehkai pat ki lah ban pynleit jingmut na ka bynta ban pynkhreh ïa ki nongïalehkai. “Ngin bteng ban ïai kyrshan ïa ki synjuk ïalehkai da ka jingshaniah khnang ba ka jingpynkhreh kan long kaba seisoh,” u la ong.
Ha kane ka sngi la sakhi ruh ïa ka jingpynkup burom ïa ka samla Rifiness Warjri ka thei ïalehkai ba dang 20 snem ka rta kaba la lah ban kiew ïa u Lum Everest dang shen da ka jingaiti ïa ka song pisa kaba 5 lak tyngkana ka liang u Myntri Rangbah bad 1lak tyngka pat na ka liang ka tnad Ïalehkai kum ka jingithuh ïa ka nam ba ka wanrah.
Halor ka jingkylli jong u Myntri Rangbah, kane ka thei ialehkai ka la ong, “Ban poi shaduh kliar jong u lum Everest kam dei satia kaba suk, nga la mad teng ïa ka jingsyier ha ka por ba nga kiew ïa u lum Lobuche hynrei ynda nga la poi sha kliar duh jong une u lum ka ai mynsiem pat ba ngan lah ban kiew haduh u lum Everest.”
Kiwei kiba donlang ha kane ka sngi ki kynthup ruh ïa kiwei ki Myntri ba kynthup ïa ka Dr. M Ampareen Lyngdoh, Bah John F. Kharshiing, Working President, Meghalaya State Olympic Association; Bah Gabriel Wahlang bad Hamlet Dohling, Advisor jong u Myntri Rangbah ka Jylla, Bah Matthew Beyongstar Kurbah, MLA, Mawphlang Constituency bad ruh u Brig. T. Jiten Singh, Group Commander, NCC nalor kiwei kiwei.