Haduh 35 tylli ki constituency kiba la pynkhreh na bynta ka Elekshon 2023: President BJP

Shillong, Naitung 23 : Ka Bharatiya Janata Party (BJP) haduh mynta ka la dep ban ïoh kyrtong na ki palat 35 tylli ki constituency nalor ki lai ngut ki MLA kiba la pyntikna ba kin aireng na katei ka party ha ka elekshon MLA kaba long ha u 2023.
Haba pyntip ïa kane hadien ka jingïalang jong ka State Executive Committee (SEC), u President ka BJP Meghalaya, Bah Ernest Mawrie u la ong ba ki la don haduh 35 ngut ki kyrtong kiba la dep ban jied ha ka kylla kaba nyngkong ïa kiba la phiah pat ha ki lai bynta.
Shuh shuh u la ong ruh ba ha ka Category A ki don 10 tylli ki constituency, nangta 20 tylli ha ka Category B bad 15 tylli ha ka Category C. Ïa kane la leh ha ka sorbe ba la pynlong da ka party hi, u la ïathuh.
Ha kajuh ka por u la ong ruh ba ka don ka jingkyrpad na ki nongkitkam ka BJP bad ruh na ki district president ban pynbna noh kham kloi ïa ka thup kyrteng jong ki kyrtong na bynta u 2023.
“Ngin sa kyrpad ïa ki bor bahalor ka party na Delhi ba kin pynbna noh kham kloi ïa ka thup kyrteng jong ki kyrtong mardor. Ngim lah ban shu pynbna kumto namar ki don ki kyndon kiba hap ban bud,” u la bynrap shuh shuh.
Halor ka jingkylli, u Bah Mawrie u laong ruh ba kitei ki lai ngut ki MLA kiba kwah ban ïakhun na ka BJP ki la dep ruh ban pyntikna ba kin wan ban pynïasoh noh shwa ka elekshon.
“Ïa mynta ngim pat kwah satia ban pynpaw ïa ka kyrteng jong ki hynrei ki la dep ban kynduh ïa ki nongïalam ba hakhmat jong ka party ha Delhi bad ruh shanga kum u state President. Tangba tad haduh ngim pat lah ban pyndep lut ïa ki kam ki jam. Nga sngew ban ong ba ngin ap ïa ka por ba kin wan ban pynïasoh noh bad ngi,” u la ong.
Ha kane ka sngi, baroh arngut ki MLA ka BJP, kata u Bah AL Hek bad u Bah Sanbor Shullai ki khlem poi sha ka jingïalang. U Mawrie u la ong ba ka daw hi kadei namar u Bah Hek u don shabar ri bad ka khun jong u, katba u Bah Sanbor pat u don ha jaka sumar namar ka jingshitom.
Ka SEC ka la ïa kren ruh halor ka jingpynkhreh jong ka party na ka bynta ka elekshon ban wan.
U President u la pynshai ruh ba halor ka jingmih ki kyrtong kiba kam ba ki la dei ki kyrtong ka BJP, u Bah Mawrie u la ong, “Kane ka la wanrah ka jingkulmar kaba jur bha hapdeng ki paidbah ha ki katto katne ki jaka ha kaba ki paidbah ki la pynbna ba ki la ïoh ïa ka tiket jong ka party lyngba ki katto katne ngut ha Delhi bad ruh na Guwahati – kane kadei kaei kaei kaba bakla haduh katta katta.”
Katkum ka jingong jong u, ka party mynta ka don ïa ki kyrtong ha jan baroh ki constituency hynrei kum ka National Party ki hap ban peit shwa ïa ki kyndon ba ki hap ban bud ha shwa ban ai ïa ka tiket ha ki kyrtong.
“Dei tad ynda la pynbna ka elekshon ba ngin sa lah ban khot aplikeshon na ka bynta kito ki kyrtong kiba kwah bad hadien kane yn sa phah sha ka state election committee bad ter ter sha ka central election committee ba khlieh da u Myntri Rangbahduh ka ri ban mynjur ïa ka thup kyrteng jong ki kyrtong,” la ïathuh biang u Bah Mawrie.