Shillong, Nailar, 07: Ki don haduh palat 31 ngut ki MLA kiba la dep ban pyntikna ba kin ïakhun na ka tiket National People’s Party ha ka elekshon MLA kaban long ha u 2023.
Haba pyntip ïa kane, ki heh nongïalam katei ka party ki ïathuh ba nalor ki 23 ngut ki MLA kiba la don lypa jong ka party, sa kumba 8 ngut ki dei na kiwei pat ki party.
Kitei ki 31 ngut katkum ka jingkheiñ ba la ai da ki heh ka party ki kynthup ïa ki 23 ngut na ka NPP, 3 ngut kiba shah sospon ha ka Congress, 2 ngut na ka TMC, 2 na ka PDF bad uwei na ka HSPDP.
Kumba long haduh mynta bad na ki jingrung NPP da ki nongïalam dang shen ka paw ba na ka Congress ki kynthup ïa ka MLA jong ka Shillong East, Kong Ampareen Lyngdoh, nangta na Shillong West Bah Mohendro Rapsang bad ruh na Rambrai Bah Kimfa S Marbañiang.
Na PDF pat ki kynthup ïa u Bah Jason Sawkmie Mawlong MLA ka Umsning bad u Bah Hamlet Dohling, MLA ka Mylliem.
Na ka HSPDP pat dei u Bah Samlin Malngïang ba dei u MLA ka Sohiong. La ïoh jingtip ruh ba na ka TMC nalor kitei ki arngut kiba la tikna ba kin wan ïasoh hynrei ka jingïakren ka dang ïaid bad sa katto katne ngut mynta.
“Haduh mynta, kitei ki 31 ngut ki dei kiba la dep ban tikna ban ïakhun na ka NPP. Ka jingïakren ka dang ïaid ruh sa bad katto katne ngut mynta, lehse shen ngin sa lah ban tip katno ngut baroh kiban ïakhun na ka party,” ong uwei na ki nongïalam ka NPP bym kwah ban pynpaw kyrteng.
Ha kajuh ka por la ïathuh ruh ba kin don bun bha ki MDC na ki lai tylli ki Autonomous District Council kiban ïakhun na ka NPP ha kane ka elekshon kaban sa long shen ha ki khyndiat bnai ban wan. Tang na East Khasi Hills kin don beit la kumno kumno 5 -6 ngut ki MDC kiba la pynkhreh shaid shaid na bynta katei ka jingïakhun.
Kitei ki MDC ban ïakhun na ka NPP ki kynthup naduh ki arngut ki longkmie kiba bat ruh kum ki Executive Member ka KHADC, Kong Grace Kharpuri ban ïakhun na Shella bad ka Kong Macdalyne Sawkmie Mawlong na Nongpoh. Nangta pat u Bah Alvin Sawkmie na Mawsynram bad u Bah Teibor Pathaw na Mawlai. La ïoh jingtip ruh ba ka jingïakren ka dang ïaid mynta wat bad u Bah Batskhem Ryntathiang MDC ka Mairang ban ïakhun na Mairang pyrshah ïa u Bah Metbah.
