Haduh 3-0 kol pynliem ka Ryntih ïa ka Malki ha ka SPL, ïoh Red Card uwei

Shillong, Jylliew 17: Ka kynhun ïalehkai jong ka Malki ka la mad ia ka jingshah rem kaba haduh 3-0 kol ha ka Ryntih, ha ka jingïakhun kaba itynnad bha jong ka Shillong Premier League kaba long hynne ka janmiet had madan Third Ground, Polo.
Na kitei ki lai kol, ar kol kidei kidei kiba la thep ha ka kylla step, kata lyngba u Badon Kupar Marbaniang uba la ïoh ban pynkhih jar ha ka minit kaba 15 bad ka kol kaba ar pat dei lyngba ka shut penalty hadien ba uwei na ki rangïalehkai ka Malki u la kum pyndei da ka kti ïa ka bol ha phyllaw kol la jong. Haba ïoh ïa kane ka kabu, u kapten ka kynhun, u Hardy Cliff Nongbri khlem bakla u la ïoh ban pynkhih jar ïa ka kol kaba ar ha ka minit kaba khatduh jong ka kylla step, kata ha ka minit kaba 45.
Ka jingïoh Red Card noh u Heisnoki Syngkon jong ka Malki ha ka minit kaba 44 jong ka kylla step ka la dei kawei pat ka dawbah kaba la ktah bad pynduh mynsiem haduh katta katta ïa ka kynhun baroh kawei. Katei ka kynhun watla ki hap ban ïakhun noh tang 10 ngut pynban ki la ïakhun borbah bad don ruh katto katne tylli ki kabu ba ki ïoh ban pynsyier ïa ki rangap dien jong ka liang pyrshah.
Hynrei na ka liang ka Ryntih da kaba shim kabu ïa ka jingduna briew, ka la nang pynstet ïa ka rukom ïalehkai bad dei tang ha ka minit kaba 64 ka la ïoh biang ban thep sa shi kol lyngba u Badon Dupar. Hadien kane ka jingïakhun ka la long noh shiliang hadien ba ka Ryntih ka la ïoh ban tehlakam khambun na ka jingïalehkai.
Haba phai pat sha ka Malki, kane ka kynhun shipor watla ka ïalehkai tang10 ngut hynrei kam shym la duh mynsiem pynban ki ïakhun tyngeh ban ïoh thep kol bad dei kane ka mynsiem ïakhun ba ka Ryntih pat ka la ïoh ban shim kabu ban pynpra ïa ka kynroh ba skhem jong ki rangap dien. Dei ha kum katei ka por ba u Khongjoh ha ka por bym poi pyrkhat u la ïoh ba pashat ïa ka bol sha u Badon Kupar bad une u rangïalehkai ruh khlem bakla u la shu pyndep suk ïa ka bol sha kol.
Na ka liang u Badon u la dei ban ïoh thep hat-trick ha kane ka sngi ha ka minit kaba 87 hynrei ka bol kaba u ïoh suk u khlem lah satia ban pynpoi sha kol.
Ka Malki ruh ha ki minit kaba khatduh ka la ïoh katto katne ki kabu hynrei ki rangthep kol jong ka kim shym la satia ban kiar na u rangap kol ka Ryntih.
Ka jingïakhun ha ka janmiet sngi Saitjaiñ pat kan long hapdeng ka Mawkhar pyrshah ïa ka Rangdajied United ha ka por 4 baje janmiet.