Shillong, Iaiong 20 : Ki paidbah ka jylla mynta ka kynti kin ioh ban sakhi haduh 19 tylli ki jait jingialehkai ha kane ka Meghalaya Games 2022 kiban pynlong ha ki lympung bapher bapher naduh ka 03tarik u Jymmang.
Ia kane la pynbna da u Myntri ka tnad Sports ka sorkar jylla, Bah Banteidor Lyngdoh hadien ka jingialang bad ka Organising Committee na ka bynta ban pynstet ia ka jingpynkhreh na bynta katei ka lympung ialehkai kaba heh tam ha ka jylla.
“Ka jingpynkhreh mynta ka la jan dep katkum ka jingkwah jong ka sorkar bad jong ka Meghalaya State Olympic Association ban sdang naduh ka 03tarik u Jymmang haduh ka 06tarik jong utei u bnai,” u la ong da kaba pyntip ba mynshwa ki don tang 14 tylli ki jait jingialehkai hynrei ki la pynrung shuh sa san tylli ban long baroh 19 tylli.
Kitei ki san tylli ki jait jingialehkai ba dang pynrung thymmai ki kynthup ia ka iakob rah nar, ka iakob ñiah cycle, golf, ka tennis, gymnastic bad ruh ia ka phutbol kaba mynshwa ki pynlong la ka jong hynrei mynta pat la kynthup lang hajuh.
“Kane ka jingpynrung shuh kadei namar ki synjuk jong ki jingialehkai bapher bapher ki kyrpad ban ioh shim bynta lang ha kane ka lympung kaba heh tam ha ka jylla ban pynkhreh pat na ka bynta ban ioh mihkhmat pat ia ka jylla ha ki lympung iakhun jong ka Ri,” bynrap biang u Myntri.
Katkum ka jingong jong u, ka jingdon ki nongialehkai kiban shim bynta kin poi haduh kumba 3,500 ngut ei ei na ka 2,500 kaba don ha ki snem ba la dep.
Haba bynrap lang, u President ka MSOA Bah John Kharshiing u la ai ka jingiaroh ia ka sorkar jylla hapoh ka jingialam jong u Myntri ba ki la shimkhia na ka bynta ban pynlong biang sa shisien pat ia katei ka lympung ialehkai kaba heh tam ha ka jylla.
U ong ruh ba da ka jingkyrshan jong ka sorkar, ki bor pyniaid ruh ki ioh mynsiem ban pynshlur lang ia kiwei pat ki synjuk ba peit ia ki jingialehkai bapher bapher bad khlem artatien ki don ka jingkyrmen ban ia beh thong lang kum ka Manipur, Mizoram ne Assam ha ka jingpynmih ia ki nongialehkai kiba kynsai bad kiba tbit ha ka Ri man u snem.
“Da kaba ngi ioh ban pynlong man u snem khlem artatien ngin sa lah ban sei bun ki nongialehkai ba kynsai ban mihkhmat pat ia ka jylla,” u la ong.
Na ka liang ki nongialam ka MSOA ki iathuh ruh ba mynta ki iohi ba wat ki kmie ki kpa ruh ki shongshit lang haba ki tip ba ka sorkar jylla sa shisien pat kan pynkhie im biang ia ka Meghalaya Games ha ka sien kaba saw ha ka jingiaid lynti kaba la 50 snem.
Ki 19 tylli ki jait jingialehkai ban pynlong ha katei ka Meghalaya Games ki kynthup naduh ka Archery, Athletics, Badminton, Basketball, Billiards & Snookers, Boxing, Cycling, Football, Golf, Gymnastic, Judo, Karate, Shooting, Swimming, Table Tennis, Taekwondo, Tennis, Weighlifting bad ka Wushu.
