Shillong, Risaw 15 : Ka Meghalaya Arm Wrestling Association ka la pynbna ba ka la jied ïa ki 19 ngut ki nongïakhun kti kynthup ïa ki 9 ngut na ka thup kiba thut dkhot met kiban leit mihkhmat ïa ka Team India sha ka lympung ïakhun jong ka Asian International Cup kaban long ha Mumbai naduh ka 19tarik – 26tarik u Risaw mynta u snem.
Kane ka jingjied ïa ki nongïalehkai ka long ruh ka dak ka jingtrei shitom bad ka jingaiti lut jong ki nongïalehkai haduh ba kin da ïoh ban don jaka ha ka kynhun ïalehkai ka Ri. Napdeng kine kiba shah jied, ki don ruh ki nongïalehkai kiba la paw bad dang khie ha katei ka lympung ïalehkai jong ka jylla.
Nalor kine ki nongïalehkai, ka MAWA ka la jied ruh ïa u Bah Aiboklang Paul Wanniang kum u captain ka kynhun ryngkat ka jingkyrshan lang ka Kong Maragaret Pathaw kum ka co-captain ban ïalam ïa ka kynhun naduh kaba sdang haduh kaba kut jong ka jingïakhun.
Ka kynhun kan mih na ka jylla ha ka 18tarik Risaw ban leit sha katei ka lympung kaban long ruh ka kabu ksiar na bynta jong ki ban mih madan ha ki lympung ïakhun kiba kham heh ha ka ri.
Na ka liang ka synjuk ka phah ruh ka jingsngewnguh ïa u Myntri Rangbah ka Jylla Conrad K Sangma bad ruh ïa ka tnad Sports jong ka jylla nangta ïa ka Meghalaya State Olympic Association kiba hapoh ka jingkyrshan jong ki, ka kynhun ka la ïoh ban jam shakhmat.
Kane ka long katkum ka kyrwoh ba la phah da u Hubert Lyngdoh Nonglait, Information Secretary, MAWA.
