Haduh 19 hajar tylli ki jingjia shah dait ksew bad kumba 15 ngut ki la ïap ha ka shi snem

Shillong, Nailur 26: Ka jylla Meghalaya, katkum ka kaiphod ka la don haduh 19,000 tylli ki jingjia shah dait ksew ha ka shisnem, ha kaba tang ha ka East Khasi Hills ki la don haduh palat 5,000 tylli ki jingjia bad kumba 15 ngut pat ki la khlad ha une u snem.
Kaba pynkyndit ka long ba bun na ki jingïap ki dei na ka daw ka jingshah dait ne ka jingtrud.
Ïa kane ka jingai jingkheiñ la pynpaw ha ka prokram rakhe ïa ka World Rabies Day ba la pynlong da ka District Joint Steering Committee for Rabies Elimination, East Khasi Hills, da ka jingïatreilang bad ka tnat Health and Veterinary, ka Shillong Municipal Board, ki NGO, bad ki nongïalam shnong ha Lumparing Sports Club Indoor Hall ha ka sngi Thohdieng.
Ïa kane ka prokram la pynlong hapoh ka phang “Act now: You, me and the community”, kaba banjur ïa ka jingdonkam ban ïatreilang ban ïada kane ka jingpang longbih na ka jingshah dait ha ki ksew (rabies).
Haba kren ha ka prokram kum u kongsan, u Myntri ka sorkar jylla uba khmih ïa ka tnat Animal Husbandry & Veterinary u Bah Sanbor Shullai u la kyntu ïa ki nongshong shnong ba kin phah ai injek ïa la ki jong ki jingri ba ki ri ha la ki ïing ki sem, ban leit kloi kloi sha ki jaka sumar haba shah dait ha ki ksew, bad ban kyrshan ïa ki ksew surok da kaba sumar ruh ïalade, da kaba ong ruh ba ka jingpang rabies kadei kaba lah ban ai ka jingïada kaba 100% hynrei kan long pat kaba ïap lada leh bym suitñiew.
Katba u PK Sangma, Additional Deputy Commissioner, East Khasi Hills, u la pynpaw ïa ka jinglong kaba donkam kyrkieh ïa ki shnong ki thaw ban leh eiei ban ïada na kane ka jingpang rabies, katba ka Dr RR Marak, District Nodal Officer, NRCP, u la sam ïa ki jingtip shaphang ki jingkheiñ halor ki jingjia shah dait ksew bad kiba la ïap na kane ka jingshah dait ksew ha Meghalaya.
Ka la ong ba ha Meghalaya ki la don haduh 19,000 tylli ki jingjia shah dait ksew ha ka shisnem, ha kaba palat 5,000 tylli ki jingjia tang na East Khasi Hills, bad ki la don kumba 15 ngut kiba la ïap ha une u snem. Bun na ki jingïap ki wan jia na ka daw ka jingshim sting ha ka por ba ki shah dait ne shah trud bad kim leit kloi sha ki jaka sumar ne ban sumar ïalade.
Ha kane ka prokram ki la don ruh ki jingkren pynsngewthuh bad ki jingïasyllok da ki riewshemphang ba kynthup na Dr. N. Marbaniang, District Veterinary Officer, Dr. Lambert Syiemlieh, Dr. Freddy Nongdhar, Bernadeth Sohtun HUFAN, Andrew Umdor (SMB), bad Dr. Iada Lyngdoh, State Nodal Officer NRCP.
Ka la don ruh ka jingshim jingsmai ba la ïalam da u kongsan u Bah Sanbor Shullai, ban kyntiew ïa ki kam ban ïakhun pyrshah ïa ka jingpang rabies. Ka la don ruh ka poster competition kaba la pynlong na ka bynta ki khynnah skul kaba long kum ka jingpynsngewthuh shaphang ki lad jingïada na ka jingpang rabies.
Ka la don ruh ka jingleit ai injek ïa ki ksew surok kaba thmu ban ïada na ka jingsaphriang ka jingpang rabies ha ka shnong baroh kawei.