Haduh 180 tylli ki dukan bar jylla khlem laisen khaïi ki don ha Shahlang, yn leit khynra ka KHADC

Shillong, Ïaïong 07: Ka Hynñiewtrep Youths’ Council-West Khasi Hills District ryngkat ka HYC Mawshynrut Circle bad ka HYC Shallang Area Unit hadien ba ki la hiar ban khynra ïa ka Ïew Shallang ha ka 4 Tarik Ïaïong 2026 la lap ba kane ka Ïew kumba 98% ïa ka khaïi pateng la bat da ki barjylla bad kila ong ba ka long kaei kaei kaba sngewsih ba ha West Khasi Hills District tang ïa katei ka ïew ki bar jylla ki ïoh rung ban kamai kajih bad khaii pateng bad ha katei ka sngi ka HYC ka la lap haduh 180 tam eiei ki dukan ne ki jaka trei ki barjylla kiba khaïi-pateng ne trei ktah hangtei ki khlem don don ïa ka Trading Licence na ka KHADC.
Kumta halor kane ka HYC West Khasi Hills District hapoh ka jingïalam jong u Bah Lumlang Kharsyiemlieh President ki la leit ban kynduh ïa u CEM ka KHADC u Bah Winston Tony Lyngdoh ban aiti ïa ka dorkhas jingujor bad pyntip ruh halor kine ki jingshem jong ka seng.
Haba kren sha ki lad pathai khubor hadien ba la ïakynduh ïa u CEM u Bah Lumlang u la ïathuh ba na ka liang ka KHADC lyngba ka Tnat Enforcement kin sa leit hiar sha Shahlang ban lap da la ki jong ki khmat halor ka jingjyllei ki bar jylla ba leh kam khaïi bad ban khang khyrdep ruh ïa ki dukan bym don trading licence.
“Halor kane ka jinglap jong ngi, ngi la wan ban kyrpad ïa u CEM ba kum u Khlieh jong ka Council kaba lah pynkup bor da ka Riti Synshar ka Ri India ba un shim kam pyrshah ïa kine ki bar jylla kiba trei ba ktah bad khaïi pateng ha Ïew Shallang khlem da ïoh bor ne ïoh ïa ka Trading Licence na ka KHADC. Ngim kwah ban kdew kti ïa kaba la dep hynrei mynta ngi wan da ka mynsiem ba sngewkhia ban kyrpad rit ïa ka burom jong phi ba phin sngewbha ban sangeh noh syndon ban ai Trading Licence ïa kitei ki bar jylla baroh ha ïew Shallang lada ki wan ban pan ïa ka Trading Licence da kaba pyndonkam ïa ka bor ba lah ai katkum ki kyndon lyngba ki aiñ jong ka District Council,” ong u Bah Lumlang.
U la ïathuh ruh ba hapoh West Khasi Hills District la ka dei ha Ïew Rambrai, Ïew Maweit, Ïew Riangdo, Ïew Nonglang bad kiwei khamtam wat ka Ïew Nongstoiñ kaba dei ka District Head Quarter, ngi la lah ban bat ïa u lakam ka Khaïi pateng da la ki Parari, te kan eh aïu ïa ka Ïew Shallang ruh ba yn bat hi noh da ki Paradoh parasnam na Shallang Area naduh mynta.
“Ka por ka dawa ba ka KHADC, ka Hima Nongstoiñ ryngkat ngi ka seng ban ïatreilang na ka bynta ban pynkut noh ïa ka jingwan khaïi pateng da ki bar jylla ha Ïew Shallang. Hooid, kam dei ka kam kaba suk hynrei kam dei ruh kaba eh haduh katta katta. Kaba donkam kadei ka jingsdang bad ka jingskhem jingmut bad ka jingïatreilang jong ki bor ba dei peit ïa kane ka kam bad ngi ngeit skhem ba ngin lah ban leh ïa kaba donkam baroh.
Halor kane u Bah Lumlang u la ïathuh ruh ba na ka liang u CEM u la pynpaw beit da kaba shai ba na ka liang ka Council kan ym ai shuh ïa ki laisen khaïi bad kumjuh ruh ban ym pynthymmai shuh ïa ki laisen jong ki bar jylla haba ki paradoh parasnam jong ka jaitbynriew ki la lah ban leh ne trei hi ïa ki kam khaïi ha la ki shnong ki thaw.