Haduh 1640 tylli ki skhim JJM kiba khlem treikam hok ha NE, 8 tylli ha Meghalaya shah pynshitom 3 ki engineer

Shillong, Nohprah 01 : Ka Ministry of Jal Shakti kala pyntip ba ka thaiñ Shatei Lam Mihgi ka Ri India kala ai jingujor haduh 1640 tylli kiba ïadei bad ka jingpyndonkam bakla ïa ka pisa bad ka jingtrei tang dep ïa ki kam hapoh ka Jal Jeevan Mission (JJM).
Napdeng kane, haduh 8 tylli ki jingujor ïa ka jingpyndonkam bakla ïa ka skhim ka dei ha Meghalaya bad haduh 3 ngut ki heh ophisar/ Engineer kila ngat ha ka jingpynshitom.
Kane ka long kat kum ka jingkheiñ bala wanrah da u Myntri Khynnah ka Ministry of Jal Shakti V. Somanna ha ka jubab da ka jingthoh hapoh ka ïingdorbar Rajya Sabha hynne ka sngi Nyngkong.
Kat kum ka jingong jong u, ka jingdon ki jingujor bala ïohpdiang na ki 32 tylli ki Jylla bad Union Territories ka Ri baroh kawei, kala kot sha ka 17,036 tylli. Kine ki jingujor kila mih lyngba ki khubor ha ki lad pathai khubor, ki nongmihkhmat paidbah, ki grievance portal, ki jingleit jurip hi dalade bad kiwei kiwei.
Wat la ka Uttar Pradesh ka kot jan 84% na ki jingujor ha ka ri baroh kawei, ka jingkheiñ ba ïoh na ka thaiñ Shatei Lam Mihngi ka pynpaw ïa ka jingduna kiba bun ha ka jingai khubor, ka jingkhmih ïa ka jingtrei bha ïa ka kam bad ka jingpyn shitom ïa kiba pyndonkam bakla.
Na ki Jylla ka thaiñ Shatei Lam Mihngi, ka Assam marwei ka don haduh 12,36 tylli ki jingujor-kaba pynbor ban ai jingpyn shitom pyrshah ïa 17 ngut ki Heh Ophisar ka Tnad, 4 ngut ki Contractor bad lai tylli ki Third Party Inspection Agency.
Ki jingujor ki kynthup ïa ka jingpyndait ïa ki pipeum kiba tad dor, ka jingbym pyndep ïa ka jingpyndait kor um, ka jingpyn slem ban plie ïa ka skhim bad ka jingkynnoh pyndonkam bakla ïa ka pisa.
Ka Tripura ka don haduh 376 tylli ki jingujor bad haduh 376 ngut ki contractor kila shah pynshitom. Ha Manipur ki don haduh 19 tylli ki jingujor hynrei la pynshitom tang ïa 4 ngut ki heh Sorkar bad 39 ngut ki contractor.
Ka Meghalaya kala register ïa 8 tylli ki jingujor bad la pynshitom tang ïa 3 ngut ki heh Ophisar/Engineer. Ka Mizoram ka don tang kawei ka jingujor katba ka Arunachal Pradesh bad Sikkim haduh mynta kim pat ïoh pdiang ïa ki jingujor.