Shillong, Risaw 22 : Ka Khasi Hills Autonomous District Council (KHADC) ka la ïoh ban lum haduh 11.57 klur tyngka (T.11,57,96, 639.00) tang na ka khajna kaba ïoh na ka Professional Tax.
Katkum ka jingïathuh da u Executive Member (EM) ba khmih ïa ka tnat Taxation u Bah Seirborlang Warbah la ong ba ka khajna ba ka KHADC ka la ïoh lum na ka Professional Tax haduh u bnai Lber 2025 ka long 75,96,936 tyngka bad naduh Ïaiong pat haduh u Nailur 2025 ka long 10,81,99,703 tyngka.
Ïa kane u EM ula pyntip haba jubab ïa ka jingkylli ba la wanrah da ka MDC jong ka Nongskhen ka Kong Grace Kharpuri ha ka sngi sdang jong ka Dorbar ha kane ka sngi Balang.
Shuh shuh u Executive Member u la ong ruh ba ka jingïoh lum jong ka KHADC ïa ka khajna Profession Tax mynta u snem ka kiew bha.
Haba pynshai halor ka rukom siew ïa ka khajna Professional tax u EM u la pyntip ba kiba kamai hapoh 50,000 tyngka ha ka shisnem kim donkam siew ïa ka Professional Tax, katba kito kiba kamai 50,000 – 75,000 tyngka kin hap siew 200 tyngka, kiba kamai 75000 -1,00,000 tyngka kin hap siew 300 tyngka, kiba kamai 1,00,000 -1,50,000 tyngka kin hap siew 500 bad kito kiba kamai 1,50,000 – 2,00,000 tyngka kin hap ban siew 750 man u snem.
Shuh shuh u EM ula pyntip ruh hapoh ka Ïïngdorbar ba ka EC kan thaw da ka rukom ba thymmai kaban peit bniah ne wad bniah ha shwa ba kin phah ïa ki notis na ka bynta na ka professional tax.
