Shillong, Risaw 28: Ka kynhun ïalehkai jong ka Meghalaya ka la jop haduh 11-0 kol pyrshah ïa ka Andhra Pradesh ha kaba u Marbiang Marwein tang marwei u la ïoh ban thep haduh saw kol ha ka Sub-Junior Boys National Football Championship 2025-26 (Tier 2) kaba long ha Narainpur, Chhattisgarh, ha ka step sngi Ba ar.
Ka Meghalaya hapoh ka jingïalam jong u coach Dapmon Tariang ka la jop haduh 6-1 kol ïa ka Chhatisgarh ha ka jingïakhun sdang kaba long ha ka sngi u Blei. Kumba long mynta ka dang bat ïa ka kyrdan ba nyngkong ha ka miej kheiñ point da ki 6 point. Katkum ki Kyndon dei tang ka kynhun kaba ha khlieh duh naman la ki group kiba lah ban rung pat sha ka semi final.
U Marbiang uba la ïoh ruh ban khur ïa ka khusnam Man of the Match u la ïoh ban pynkhih jar ha ka minit kaba 2 mar ïa sdang ka jingïakhun nangta u la ïoh pat ban pynbud ha ka minit kaba 22, 44 bad 45 minit. Une u heprit u la ïoh ruh ban thep haduh ar kol ha ka jingïakhun pyrshah ïa ka Chhatisgarh kaba pynlong ïa i ban ïoh thep haduh 6 kol tang ha ki ar sien ïakhun.
Kiwei pat kiba ïoh ban thep kol ha kane ka sngi ki kynthup ïa u Ïaishanborlang Khongjee ha ka minit ba 8, Damebandon Mawkhroh ha ka minit kaba 16, Wanpyndapbor Nongsiej minit ba 35, Shiborlang Dkhar ha ka minit kaba 59 bad 66, Davidson L Marshilong ha ka minit ba 81 bad Ferdinand Kharkrang ha ka minit kaba 85.
Mynta ka kynhun kan hap ban ïakhun sa kawei pat ka jingïakhun pyrshah ïa ka Himachal Pradesh ha ka sngi Palei ha ka por 8:30 baje mynstep.
