Haduh 10 ton u sohmrit khlaw mih na Meghalaya ban leit sha Mumbai, beit beit sha Everest Spices

Shillong, Naitung 06 : Ka Meghalaya ka la ïoh ban shalan biang haduh 10 ton u sohmrit khlaw (black pepper) sha nongbah Mumbai na ka bynta ban shna musli musla.
Haba pyntip ïa kane ha ki rynsan social media, u Myntri Rangbah ka Jylla, Conrad K Sangma u la pyntip ruh ba une u sohmrit khlaw ba shalan sha Mumbai ha ka sngi Saitjain u dei uba pynmih na ka thaiñ South Garo Hills.
“Haduh 10 MT u sohmrit khlaw ba pynlang da ka Kerupara bda Dingampara Integrated Village Cooperative Societies (IVCS) kaba hap ha Zikzak Block, South West Garo Hills, la ïoh ban shalan sha Mumbai. Kane kadei ka sien kaba ar ba la ïoh ban shalan bun bha u sohmrit khlaw hadien ba la dep phah 11MT ha u snem 2023,” ong u Myntri Rangbah lyngba ka jingthoh jong u ha ka ‘X’.
Da kaba ïaroh ïa ki tnad kiba dei peit kiba la trei borbah halor kane ka phang u Myntri Rangbah u la bynrap da kaba ong, “Da ka jingkyrshan borbah jong ka Meghalaya Basin Management Agency (MBMA) bad ka Meghalaya Livelihoods and Access to Markets Project (M-LAMP) ki kynhun treilang na ka thain ki la lah ban pynkylla ksiar iong ïa une u mar rep,”
Katkum ka jingïathuh jong u Myntri Rangbah, ïa une u mar rep ba pawnam bad ba rem dor bha ba ka jylla ka pynmih la thied da ka kompeni pynmih musli musla ba pawnam ha ka ri, ka Everest Spices.
“Ka jingdawa ïa ki musli musla ba ka Meghalaya ka don ka jur bha bad kumta long kaba sngew dei ban pynshlur shuh shuh ban pynjur ïa kane ka jingthung ïa ki mar rep ba long musli musla na bynta ka jingïoh nong,” u la ong.
Ka Meghalaya kadei kawei na ki jylla kaba khlain bha ban pynmih ïa ki musli musla bad ka la pawnam ruh ha ka pyrthei ha ka jingpynmih ïa u shynrang Lakadong. Man u snem ka jylla ka ju shalan shabar bun bha u sying, u shynrang, u latyrpad bad bun kiwei kiwei ki mar rep ba ju pynkylla musli musla.