Haduh 10 persen kiew ka ïohkam ïohjam ki ritpaid ha ki kam Sorkar: Minority Affairs Minister

New Delhi, Ïaiong 02 : U Myntri ka tnad Minority Affairs jong ka sorkar pdeng, u Mukhtar Abbas Naqvi ha ka sngi Saitjaiñ u la ong ba bun ki samla kiba dei na ki jaidbynriew ritpaid ki shah jied ha ki kam kiba heh bad jop ruh ha ki eksam kam namar ka polisi (Backup to Brilliance) jong ka tnad.
Ïa kane u la kren hadien ka jingplie ïa ka Anjuman-I-Islam’s UPSC Academy (AIUPSC), kaba dei ka jak aai jinghikai na ka bynta ki Civil Services bad kiwei ki eksam ïakhun kam jong ka sorkar kaba long ha New Panvel hajan Mumbai.
U Myntri u la ong ruh ba ka jingdon ki rit paid ha ki ophis treikam jong ka sorkar pdeng ka dei tang hapoh 5 persen ha shwa u 2014. Hynrei mynta pat u la ong ba ka la kiew sha ka 10 persen da kaba kam ruh ba katei kadei na ka daw jong ka polisi jong ka sorkar.
Katei ka AIUPSC kadei na bynta ki samla pule bad ki kyrtong kiba dei na ka jaidbynriew Muslim. Ïa kane ka prokram ruh la pynlong da ki bor pynïaid jong ka Anjuman-I-Islam ïa kaba la bei tyngka da ka Central Waqf Commission, Ministry of Minority Affairs, Sorkar India.
U Myntri u la ong ruh ba ka skim Pradhan Mantri Virasat Ka Samvardhan (PM VIKAS) kaba la treikam naduh katei ka sngi, kan long ka sienjam na ka bynta ka ïoh ka ka kot, ka jingkyntiew ïa ka pule dangle jong kiba duna ka ïoh ka kot nalor ba ki ïoh ruh ïa ka lad ha ka ïohkam ïohjam.
Nalorkata, u Myntri ka tnad Minority u ong ruh ba ka sorkar ka la ai jinghikai ruh na ka bynta ban sengkam seng jam bad ki lad ban ïohkam ïohjam sha kumba 21.5 lak ngut ki briew na ki jaidbynriew ritpaid lyngba ki lad jingïarap bapher bapher kum ka “Hunar Haat”, “Seekho aur Kamao”, “Nai Manzil”, “Nai Roushni”, “Ustad” bad “Garib Nawaz Self-Employment Scheme” ha kine ki 8snem.
“Kane ka long mar khongpong na ka 20,000ngut ki ritpaid kiba ïoh jingïarap na kum kitei ki kabu ksiar ha shwa u 2014,” la bynrap biang u Myntri.
Kawei pat ka bynta u Myntri u kdew ka long ba katba ki don tang 3klur ngut ki samla pule ba wan na ki jaidbynriew rit paid kiba ïoh jingkyrshan pisa na ka sorkar (scholarship) ha shwa u 2014, mynta na ka liang ka tnad ka la ai bai bam sha kumba 5.2 klur ngut ki samla pule ha ki 8 snem ba la dep.
Katkum ka jingong jong u, ki projek kiba shongdor palat 18,000 klur tyngka kiba la dep tei bad pynieng kylleng ki bynta ba long kyndong jong ka Ri. Kine ki kynthup naduh ki skul, ki college, ki kamra class, ITI, polytechnic, hostel, common service centres, skill development centres, hospital, ki jaka pynbiang ïa ki umbam umdih, ki jaka ïalehkai, ki Sadbhav Mandaps, Hunar Hubs, nalor kiwei kiwei.