Haduh 1 lak ngut ki samla pule kin ïoh Scholarship ha ka sngi dap 8 snem ka sorkar MDA

Shillong, Rymphang 25 : U Myntri Rangbah ka jylla u Conrad K Sangma u la pynbna ban pyllait noh ïa ka CM’s Scholarship sha palat shi lak ngut ki samla pule ha ka 06 tarik u Lber, kaba deika sngi ba rakhe ïa ka jingdap 8 snem jong ka sorkar Meghalaya Democratic Alliance (MDA) ha ka bor synshar.
“Ha ka 06 tarik u Lber, ka sorkar MDA kan dap 8 snem ha ka jingsynshar bad ka dei ka por kaba sngew sarong ïa ngi na ka bynta 8 snem ba ki paidbah ka jylla ki la ailad ban shakri ïa ki,” la ong u Conrad haba jubab ïa ka jingïatai halor ka Mangtyngka ha Iing Dorbar Thawain ka jylla ha ka sngi Balang.
Kumta, ban rakhe ïa ka jingdap 8 sem jong ka jingshakri ïaka jylla bad ïa ki paidbah ka jylla, kum shi bynta jong ka prorkam ngin sa pyllait ïa ka CM’s Scholarship sha ki shilak ngut ki samla pule ha ka 06tarik mynta u bnai,” u la ong.
U Myntri Rangbah u la kdew ruh ïa ka jingpyrshang jong ka sorkar ban kyrshan ïa ki khynnah skul, khamtam ha ki jaka nongkyndong, da kaba ai ïa ki guidebook ban kyntiew ïa ka jingpass bha ki samla pule ha ka Secondary School Leaving Certificate (SSLC).