Hadien shi bnai ba jah, lap ïa ka met ïap u rangbah na shadien ka Tura Medical College

Tura, K’Lyngkot 24: Ïa ka metïap jong uwei u rangbah uba la 53 snem ka rta uba la jah rngai mynta la palat shibnai la ïoh tam ha ka sngi Balang na ka thaiñ Doldegre, kaba don shadien jong ka Tura Medical College.
Utei u rangbah uba la khlad la tip kyrteng kum u Mensing M. Marak uba dei u trai shnong na Garobadha, Maljanggre uba sah ha ka thain ITI ha Tura.La pyntip ba u la jah naduh ka 13 tarik u Nohprah, hadien kata ki bahaïing hasem ki la pynphriang ïa ki poster ba la jah ha kylleng ka sor.
Katkum ki tyllong khubor, ki nongshong shnong ki dang pynkhuid ïa kawei ka jaka ha ka thain Doldegre haba ki la lap ïa ka met ïap kaba la pyut.Ïa kane ka kam la pyntip mar mar sha ki Nokma jong katei ka thain, kiba la pyntip sha ki pulit jong ka Araimile Police Station.Ki kynhun pulit ki la leit sha katei ka jaka bad ki la rah noh ïa katei ka metiap.
Ïa ka met ïap la phah ban leh ïa ka post-mortem hadien ka jingiap, kaba la buh ban pynlong mynta ka sngi, ryngkat bad ka jingshim nuksa DNA ban pynthikna ïa ka jinglong jong ka.
U Superintendent of Police ka West Garo Hills, u Abraham T. Sangma u la ong, “Ka kynhun jong ngi ka la wad naduh ba la ai ïa ka kaiphod jong ka jingjah jah.Da kaba pynshong nongrim ïa ki jingtip ba kyrpang, ka kynhun na Araimile Police Station ka la ïoh ban tam ïa ka metïap kaba la pyut.Kumba long mynta kam shym la paw ba kan don kano kano jingshah leh sniew, hynrei ki dap ap ïa ka post-mortem report ban pyntikna.”
Ki pulit ki la sdang ïa ka jingtohkit kaba kham bniah, bad la khmih lynti ba kin ioh ïa ki jingtip ba bniah hadien ba la ioh ïa ka kaiphod jong ki doktor bad na ka forensic.