Shillong, Risaw 5: U Symbud Myntri Rangbah ka Jylla uba dei peit ia ka tnad Urban Affairs, u Ma Sniawbhalang Dhar mynta ka sngi Palei, ula ïathuh ba ka jingïakren bad ka Harijan Panchayat Committee (HPC) kan long hadien ka shuti Puja khnang ban ioh pynkynriah noh ia ki 342 tylli ki longiing na Them Metor.
“ Hadien ka Puja ngan sa khot ia ka HPC ban iakren namar kumba long mynta kiei kiei baroh ki la iaid shakhmat hapdeng ka jingiasngewthuh jingmut” ong u ma Sniawbha.
U Ma Sniawbha ula kdew ba wat ka ïing bishar ruh ka la hukum ïa ka sorkar jylla ba ka dei ban pyndep ïa kane ka kam hapoh une u snem, kumta kin ïaleh ban pynbeit noh ïa kane hashwa ban kut u 2023.
“ïa mynta lehse ki ophisar ki dang bunkam bad ki prokram bapher hynrei tang shu kut ka shuti Puja ngin ïaleh ban pynbeit kloi noh ïa kane ka kam. Ka dei da ka jingïakren bad ngi khmih lynti ba kaei ka ban mih kan long kaba bha” ong u Bah Dhar.
Ula ïathuh ba kam shym la don kano kano ka jingdawa kaba thymmai hynrei ki la kyrpad pat ban don ka jingpynkylla hangne hangta ïa ka jingdawa kaba ki la dep ban dawa kham mynshwa. Kumta halor kane ka jingkyrpad jongki ka sorkar ruh ka la pyrshang ban pynbeit khnang ban ïoh pynkut noh kloi ïa ka kam.
Lah ban pynkynmaw ba ka sorkar ka la pynkhreh ban pynkynriah ïa ki na Them Metor kaba ha ïew Mawlong sha ka jaka jongka ophis Shillong Municipal Board.
